800/2026-2027

Dated Hnahthial, the 2^nd June, 2026: Vawiin khan DC Conference Hall, Hnahthial-ah Sorkar Flagship Programme - Bana Kaih Scheme hnuaia Chief Minister Special Package Phase-II semna hun chu neih niin South Tuipui Bialtu MLA, Pu Jeje Lalpekhlua chuan khuallian niin a hmanpui a. Pu Zothanmawia Khiangte, Addl. Deputy Commissioner, Hnahthial chuan semna hun hi kaihruaiin tanpuina sum hi Hnahthial District atangin mi sawmhnih leh pali (24) ten an dawng a ni.

Khuallian chuan thu sawiin sawrkar atanga hamthatna awmte chu a dawngtuten a nihna tur ang taka an hmang chhuak lo thin chu pawi a tih thu a sawi a. Tuna CM Special Package an dawn tur pawh hi a hma a lo dawng tawh ten engtin nge an hman tih ngaihven chunga a tha thei ang bera hmang turin a dawngtute chu a chah a. Sorkar hmalaknate a hlawhtlin theih nan Department lama hotuten theihtawp an lo chhuah thin chu lawmawm a tih thu a sawiin he tanpuina dawngtuten harsatna engpawh an nei a nih chuan a changtu Department-te chu rawn hreh lo turin a chah a ni.

Pu Zothanmawia Khiangte, Addl. DC, Hnahthial chuan CM Special Package chu tum bik neia thilthlawn pek a nih angin a dawngtute chu a hlawhtlinna hmu thei tura tan la turin a chah a, a petute tihmingchhetu nilo hram turin a chah nghal bawk. 

Thusawi zawh hian DIPRO Office atanga Bana Kaih Success Story buatsaihte chu thlir ho nghal a ni. 

CM Special Package Phase-II atanga tanpuina dawngtu awm zat leh an Department dilnate chu tarlan ang hi a ni :-

1. Commerce & Industries - Mi sawm leh pali (14)

2. Agriculture & Farmers' Welfare - Mi Pakhat (1)

3. Fisheries - Mi Pariat (8)

4. Urban Development & Poverty Alleviation - Mi Pakhat (1) 

Tanpuina sum hi a vaiin mi Sawmhnih leh Pali (24) te hnehah pek niin Progress Partner pakhat tan tanpuina Rs 50,000 zel pek an ni. He hunah hian a changtu Department-te hnen atangin hriattur pawimawh inhrilhhriatna hun hmang nghal a ni bawk. 

Programme zawh hian Pu Jeje Lalpekhlua chuan Hnahthial khaw chhunga hnathawh mek te chu a enfiah nghal a ni.