801/2026-2027

Aizawl; 2nd June, 2026: Vawiin   khan Vana Pa Hall-ah DC office buatsaihin Bana kaih (Handholding) scheme hnuaia CM's  Special Package  Grant phase -II  dawngtu progress partners 277 te hnenah Orientation training leh package semna programme neih a ni a. Chawhmaah Orientation Training neih niin, chawhnuah CM’s Package semna hun hman a ni thung CM’s Special package semna hun hi Aizawl bawrhsap Er.Lalhriatpuia'n  kaihhruaiin, Dr.KC Lalmalsawmzauva, Adviser to Chief Minister, Handholding Scheme leh Vice Chairman Mizoram State  Policy Coordination Committee (MSPCC) ni bawk chuan khuallian niin  hun a hmanpuia,  CM’s special package  grant phase-II , progress partners te hnenah certificate a sem nghal  a ni.

Vawiin programme-ah thu sawiin Dr. KC Lalmalsawmzauva chuan India ram state hrang hrang ten, an mi leh sate eizawnna leh chawikanna tur an duan zingah hian Mizoram Handholding scheme hi a tha ber a nih loh pawhin a aia tha kan hre mai lo.Kan handholding scheme hnuaiah hian sawrkar guarantor-a a tan bakah a pung zawng zawng a rulhpui leh vek a  ni. Hriat theih chinah States 7 vel hian an mi leh sate tan sawrkar guarantorah a tang a, chutih laiin, keini anga a pung zawng zawng rulhsak (100% interest free loan) pe hi chu Telengana state chiah an awma, chu pawh women entrepreneur mi 300 tan chauh a ni. Heti chunga kan hlawhtlinpui thei lo a nih chuan entrepreneur te pawh inenfiah kan ngai ang, a ti.

Dr. KC. Malsawmzauva chuan CM Special Package hi a thlawna sum sem ringawt a ni lo, Project based a ni. Project-based kan tih kherna chhan pawh- ruahmanna felfai tak nen hma in lak kan duhpui vang che u a ni. Uluk takin implementing department leh District Monitoring team ten an rawn umzui dawn che u a ni. Keini ho zingah hian ti tak tak lo kan lo awm palh a nih chuan in mualpho hle dawn a ni. Handholding Guide book page-5 naah chuan pawisa hmang tha lo te chu hrem theih an ni anga, an pawisa dawn tawh laksak emaw, a pawisa hu thil dang chawitir theih a ni ang’ tih a awm kiau a ni. Kan ram hian lem chang nilo, mi ti tak tak kan mamawh tawh, a ni a ti bawk.

Sawi zawmin, khuallian chuan hmasawnna hi mi tam tak chuan sum leh pai-ah kan the fo thin; a ni ber lo. Hmasawnna   reng reng mihring-ah a thleng hmasa tur a ni. Rilru lama hmasawnna a thlen hmasak loh chuan sum a tam poh leh kan chhiatpui nasa ting mai. Mizo zingah hausak zo lo hmuh tur kan tam lutuk. Sum tlemte chunga rinawm leh dik chu sum tam tak-ah pawh an rintlak ang. CMSP in hman tangkai danah in mizia leh quality a lang dawn a ni, a ti.

Mi thenkhat te atangin kan va dawng har ve? Kan submit rual reng si a, tinge a ni’n a dawna ka la dawn  ve loh? tih zawhna an dawn nasat thu sawiin, a chhanna chu hetiang hian a sawi:

Dilna reng reng a kaihhnawih department ten an endik hnuah Departmental Nodal Committee (DNC) ten a changtu Minister hoin an endik thlap hnuah Apex Body-ah an lo thehlut a, an ni’n an approve leh thin.

Department thenkhatin an ngah deuha, a thenin an nei tlem deuha, a ruala submit pawh nise a department kaihhnawihte DNC thut hun a in an loh avangin an dawn hun a in ang thei thin lo a. Department chak leh chak loh ah thui tak a innghat a n, a ti.

Sawhthing Support Price pawh kan in pe chhuak mek zela, tuna la hmu mai lo te pawh DAMC lamah lo zawt ula, an ni lamin an rawn tihfel chuan inpek chhuah zel kan tuma, dawhthei taka lo nghak hram hram turin kan in chah a ni.Kalphung thar hnuaiah chuan fimkhur taka kal kan tuma, a process pawh a chak vut vut theih loh chang a awm thin, a ti bawk.

Mizoram pumpuiah Bana Kaih phase 2 hnuaiah CM Package dawng tur Progress partners Apex Body-in a approved tawh hi mi 1129 an awm tawh a, a sum zawng chuan Rs. 5,62,36,997/- (5.32 crores) a ni. Phase –II hnuaia progress partners 439 hnenah Loan Rs. 40,51,85,565/- (40.5 crores) pek chhuah tawh a ni bawk.

Vawiin Aizawl district huam chhunga CM’s Special package dawngtu Progress Partners, department wise a  awm dant chu: 

Tanpuina sum hi  installment a pe lovin, a vaiin vawikhatah  DBT  in  Progress partner te  Bank account-ah  thunsak vek an ni ang. Progress partner pakhat hnena  tanpuina sum  pek hi  ₹50,000 aia tam lo theuh a ni.

Pu Lalhmangaiha, DCIO chuan ‘Vote of thanks’ sawiin vawiin programme hi a khar ta a ni.

2026-2nd June-CMP semna.pdf