802/2026-2027

Serchhip, the 2nd June, 2026: Vawiin khan Serchhip District AIDS Prevention and Control Committee chu an Chairman, Serchhip District Bawrhsap Pu Paul L. Khuma kaihhruainain an thukhawm a. He hunah hian 'Mobilization for AIDS Suraksha' chungchanga Serchhip District Action Plan siam chungchang sawi ho a ni.

Pu R. Lalhruaitluanga leh Dr. Alfred C. Lalhmingmuana, DISHA Lunglei-ten District Action Plan Presentation pein, '95-95-99' target-a Serchhip District dinhmunte an tarlang a. 95-95-99 hi HIV/AIDS dona kawnga bituk pawimawh tak niin a awmzia chu HIV hrik pai zinga 95% ten inentirna hmanga an inhriat chhuah a, chung zinga 95% ten damdawi (ART) an ei a, damdawi ei zinga 99% ten an taksaa HIV hrikte an thunun (suppress) na tur a ni a. Serchhip District- dinhmun chu - Target 1st 95-ah 68.8% awmin, 2nd 95-ah 95% hnuailam niin, 3rd 99-ah hi 95.9% te a ni a. Vawiin meeting-ah hian heng target-te hi tha zawka hlen a nih theih nan, sawrkar leh khawtlang hruaitute thawh ho a pawimawh zia sawi lan niin District Action Plan bawhzuina kawnga an mawhphurhnate thlir ho a ni bawk.

Pi Lalruatfeli, Programme Officer, P&OCS CSS chuan District Community Resource Group (D-CRG) pawimawhzia sawiin, TE DISHA YRG Pu Peter Lalrinngheta’n 'Breakfree Website' chungchang a hrilhfiah a. He website-ah hian HIV/AIDS chungchanga mahni inbihchianna (self-assessment) te, testing tih dan leh tih theihna hmun te, leh ART Centre awmna hmun hrang hrang te a en vek theih a ni. He website-ah hian Artificial Intelligence (A.I.) dah nghal niin, mizo ṭawng ngeiin HIV/AIDS chungchanga zawhna neih zawng zawngte a zawh theih nghal vek bawk a ni. He website hi mipui zawng zawngin an hman tangkai theih nan a tam thei ang ber theh darh (publicise) nise tiin committee chuan a rel a ni.

Vawiin meeting-ah hian Serchhip District-a kum tina kalpui thin 'Red Ribbon Quiz Competition' chu kumin hian hlawhtling taka neih leh tura rel a ni bawk a. District Level Quiz Competition hi ni 30 July, 2026 hmaa neih tura tih a ni a. School Level Quiz chu ni 18 June, 2026 hian Serchhip District chhunga Class 8, 9 leh 11 zirlai zawng zawng tan neih a ni anga, School hrang hrang zinga ti tha 'Top 10' te thlang chhuakin, District Level Competition chu ni 28 July, 2026 hian DC Pisapui Hall-ah neih zui tura rel a ni bawk.