803/2026-2027

Aizawl, 2nd June 2026: Dr. L. Murugan, Hon’ble Union Minister of State for Information & Broadcasting and Parliamentary Affairs, Government of India chuan zan khat riaka Mizoram rawn tlawh turin vawiin khan Lengpui Airport a lo thleng.

Union Minister hi Airport-ah Information, Public Relations, Printing & Stationery department changtu minister Pu B. Lalchhanzova leh Information & Communication Technology changtu minister Dr. Vanlalthlana te bakah sorkar hotu lian dangten an lo hmuak a ni.

Airport-ah hian meeting nei nghalin, Minister Pu B. Lalchhanzova chuan Mizoram chhunga chanchinbu/media, film industry, leh digital infrastructure tihmasawnna tura rawtna pawimawh tak tak te Union Minister hnenah hian a thlen a ni: 

1. AVGC Content Creator Labs: Mizoram chhunga school 200 leh college 20-ah te Animation, Visual Effects, Gaming, leh Comics (AVGC) Content Creator Labs din a nih theih nan allocation siamsak turin a ngen a, hei hian thalaite zingah digital content siam lam leh eizawnna thar (entrepreneurship) a tih hmasawn beisei a ni.
2. Filmmaker-te Chawikanna (Capacity Building): National Film Development Corporation (NFDC) leh Film and Television Institute of India (FTII) te anga institution hmingthangte kaltlangin Mizo filmmaker-te tana training & skill development programme buatsaih a nih theih nan.
3. Lemchan Film Festival support: Kumin kum tira a vawi khatna atana buatsaih Lemchan Film Festival chu thlawpa neih chhunzawm zel a nih theihna tura hma laksak tur leh, tualchhung thiamna leh kutchhuak te pho chhuah rualin film industry chhunga thawhhona tha zawk a awm theih nan he festival hi ni 5 chhung tala pawtsei tura ngen a ni.
4. Cinema Theatre Infrastructure: Hmar Chhak (North East) state-te tan bik cinema theatre infrastructure chei that leh din thar nan scheme hrang siamsak turin an rawt a; hei hian tualchhung ṭawng, hnam zia leh nunphung vawn nun rualin hnathawh tur tam tak a siam dawn a ni.
5. State-Led Media Projects: Information & Broadcasting Ministry hnenah Hmar Chhak state-te tana 10% Gross Budgetary Support (GBS) dah hran atang hian Mizoram sorkar hnuaia project thar leh hmasawnna tura ruahman hna hrang hrangte sum sanction sak turin a ngen a ni.
6. Film Festival Exposure: Mizo filmmaker-ten ram chhung leh khawvel huap film festival lian tham hrang hrangah te an tel ve theih nana institutional support pek chhunzawm zel turin a ngen bawk a ni.

Union Minister pawhin mamawh an thlen te chu tihhlawhtlin ngei a tum thu a sawi a, Mizoram film festival-ah pawh lo kal ve a chak thu a sawi bawk a ni. 

Official schedule tarlan dan chuan, Union Minister hian vawiinah Kolasib district-ah hun a hmang chhunzawm anga, District Deputy Commissioner leh official dangte nen inkawmhona leh review meeting an nei dawn a ni. Zanin hian Kolasib Circuit House-ah a riak ang a, naktuk zing lamah project site hrang hrang a tlawh chhunzawm dawn a ni.