Vawiin khan Sawrkar laipui scheme Gram Swaraj Abhiyan (Village Self-Governance Campaign) peng pakhat Kissan Kalyan Karyashala (Workshop on Farmers’ Welfare) chu DAO’s Conference Hall, Aizawlah neih a ni a. He hunah hian Lok Sabha MP, Pu CL Ruala chu Khuallian niin Agricultural Technology Management Agency (ATMA) buatsaih a ni.

Khuallian Pu CL Ruala chuan kum 2022-a loneitute hlawkna a leta a pun theihna turin kan ram chhunga mi thiam tak tak (scientist-te), kan ram leilung bakah kan ram sik leh sa zira thlai chin tur loneitute kawhhmuh theitute hi an pawimawh hle a ni tiin hemi kawnga min kaihruai theitu ber an ni, a ti a. Loneitute leh kuthnathawktuten hlawk taka hna an thawh theihna turin hemi lama department kaihhnawih hotute leh mi thiam te chu thahnemngai taka hmala turin a fuih a. Leilung hriselna ngaih pawimawh a tul a, thlai hrang hrang kan chinte hian kan leilung tichhe zawngin an kalpui em tih te kan zirchian hmasak a ngai a ni, tiin kan ram leilung mil a zirin thlai chin kan thiam angai a ni, a ti a. Loneitute leh kuthnathawktute hlawk taka hna an thawh theihna tur hian kawng hrang hrang a in hawng mek a, food processing industry lamah te kan huang kan zauh a ngai a, processing unit changtlung zawk kan neih a ngai tel bawk a ni, a ti a. Thlai chi tha zawk a hun taka loneituten an neih theihna atana hmalak hi kan tih tur a ni tiin department hrang hrang te chu a chah a. Ram pawn lama thei man to tak tak, ram chhung ngeia tharchhuah theihte chu uar zawka chin a nih theih nan loneitute chu a chah bawk a ni.

Sawrkar laipuia Ministry of Agriculture & Farmers Welfare chuan kum 2022-a loneitute hlawkna a leta tihpun tumin hma a la mek a. He hmalakna hi Prime Minister chhawpchhuah niin thlai chin ten an mamawh ang zela tui hnianghnar taka pek te, thlai thar chhuah dahthatna tura warehouse leh cold chain tam zawk neih te, thlai thar chhuahte food processing hmanga an hlutna tihhmasawn te, ar vulh, khuai khawi tihmasawn te a huam a. Mizoramah pawh line department (Agriculture, AH&Vety, Horticulture, Fisheries, Sericulture, Land Resource/Soil & Water Conservation Department )leh KVK ten he hmalakna tihhlawhtling tur hian hna an thawk mek a ni.  

Vawiin program hi Tlangnuam Block Technology Manager (BTM), Dr. H. Lalbiaksangi chuan a kaihruai a. Tlangnuam BDO, Pu Andy Lalfakzuala Varte chuan programme chungchang sawizauna a nei a. Agricultural Technology Management Agency (ATMA), Aizawl Project Director Pu R. Lalnunzira chuan loneitute fuihna hun a hmang a. Loneitute leh kuthnathawktute zinga titha zual mi 10 hnenah Khuallian chuan certificate a hlan a. Agriculture, AH&Vety, Horticulture, Fisheries, Sericulture, Land Resource/Soil & Water Conservation Department atangin sawrkar laipui leh state sawrkar hnuaia loneitute kaihnawih scheme hrang hrang sawina hun neih a ni a. Chawhnu lamah workshop hi chhunzawm niin scientist-te leh loneituten inkawm hona hun neih a ni ang. He hunah hian Tlangnuam RD Block huamchhunga loneitute, mi 100 chuang an kalkhawm a. Vawiin ni vek hian he programme hi Darlawn RD Block, Phullen RD Block, Aibawk RD Block, Thingsulthliah RD Block-ah te neih niin programme zawh hian AH&Vety Department chuan Free Animal Health Check-up an kalpui dawn bawk a ni.