Nimin zing khan Pu Joseph Lalhimpuia Chairman, Mizoram Youth Commission, Lunglei East Bialtu MLA ni bawk chuan a bial chhung Chanmari vengchhunga inkalpawhna kawng pawimawh tak Millenium Road siam that tur chu Pu Samuel Ramdinthara EE PWD, VC leh YMA hruaitute nen a hmunah kalin an en.

Millenium Road hi Chanmari vengchhung inkalpawhna atan a kawng pawimawh tak a niin, Pu V. Rohmingthanga, President Chanmari Br. YMA chuan, Vengchhung kawng pawimawh tak mai, zirna in kawngte, sumdawnna hmunpui Bazar pui panna kawng leh Chanmari veng Hall, Lunglei mipuite tana Hall pawimawh tak kalna kawng, a pawimawhna leh hlutna hria a Bialtu MLA in siam that a nih theih nana hma a la chu lawmawm a tih thu sawiin vengchhung hmasawnna tura hmalakna hrang hrangah YMA chuan theihtawp chhuaha hmalakpui an tum thu a sawi a. Millenium kawng siam anih hunah pawh YMA ten PWD te an theih anga hma lakpui an tum thu a sawi bawk. VC member Pu Zorammawia pawhin, Vengchhung mai bakah Lunglei mipuite tan pawha kawng pawimawh tak mai siam that a nih theih nana Bialtu MLA Pu Joseph Lalhimpuia'n hma a la leh vengchhungah hmasawnna tam tak hmuh theih a a awm ta hi lawmawm a tih thu a sawi bawk.

Pu Joseph Lalhimpuia chuan, khawtlang hruaitu YMA leh VC ten vengchhung hmasawnna ngai pawimawh a, lungrual taka theihtawp an chhuah thin chu lawmawm a tih thu sawiin, millenium kawng siam that nan hian sorkar ah theihtawp chhuah a hmalak a tum thu a sawi.

Attachment

  • Loading attachment...