3197/2022-2023

Aizawl, 9th January, 2023 : Indian Institute of Mass Communication, North-Eastern Regional Campus buatsaih ni 5 awh tur “Short Term Course for Media Persons from Sikkim” chu vawiin khan Lok Sabha MP Pu C. Lalrosanga’n Mizoram University Guest House Seminar Hall, Tanhril-ah a hawng.

January ni 9 – 13, 2023 chhunga neih tur Short Term Course for Media Persons ah hian Sikkim sawrkar hnuaia Information & Public Relations Department official 4 leh journalist 16 an tel a ni.

Training Course hawngtu Lok Sabha MP Pu C. Lalrosanga chuan Sikkim atanga media person an hnaa tui leh thahnemngai tak tak hmel a hmu chu lawmawm a tih thu sawiin, Sikkim a journalism hmasawn danin a ti lawm hle tih a sawi a. Tunlai khawvelah journalist te tan taimak chhuah lehzual mai bakah dil chhut lehzual a tul tawh hle a, digital media hi kan hman thiam a kan chhawr tangkai a pawimawh hle tih sawiin, social media a thang chak em em a, hetih rual hian thuthang lengvel a tam bakah rinthu sawi darh vak vak a tam ta hle a, hmun tinah media lama zirna leh thiamna nei lem lo ten sum siam nan YouTube channel an siam a, heng hian mipuiteah chi-aina leh rilru phirna nasa takin a thlen a, hengte a nih avang hian journalist dik takte chuan tan kan lak a ngai a, mipuite hnenah eng hi nge awih tura awih loh tur, tihte kan zirtir a ngai a, thudik leh rintlak mipuite hnena thlen turin tan kan lak nasat hle a ngai a ni, a ti.

Journalist te chu an hnathawhna kawngah dikna chawi nung tura chahin Pu C. Lalrosanga chuan journalist te thu leh hla hi mipuite ngaihdan leh sukthlek siamtu a nih fo avangin mawhphurhna lian tak an nei a ti a, an thuchhuah thinah chiang thin turin leh anmahni pawh inzir reng a, thu zawh tlak leh mi rintlak ni reng turin a chah a, hei hi an hlawhtlinna atana pawimawh ber a nih thu a sawi bawk a ni.

IIMC North-East Campus Regional Director Pu L.R. Sailo pawhin inlawmna thu sawi pahin course an pek tur chungchang a sawi fiah a, Sikkim Chief Minister Prem Singh Tamang hmalaknaa he short term course hi buatsaih a nih thu sawiin, Sikkim Chief Minister media person te hmasawnna ngai pawimawhtu an nei chu vanneihthlak a tih thu sawiin, India hmarchhak state dangte pawhin rawn chhunzawm se a duh thu a sawi bawk.

“Short Term Course for Media Persons from Sikkim” hi IIMC, North East Campus in hetiang lam training course an buatsaih hmasak ber a ni a, ni 5 chhung hian  topic pawimawh tak tak “Challenges for Journalists in the North-East”, “Journalism in the Digital Age:Challenges for Reporters”, “Overview of Journalism in India”, “Media Laws and Ethics-Fake news and verification”, “News sourcing, Reporting and Editing”, “Media Literacy”, “Open Source and Content Management System”, “Specialized Reporting” etc., an zirho ang a, DIPR officer te nen inkawmhona hun an hmang bawk ang.