3196/2022-2023

Aizawl, the 9th January 2023: Vawiin khan Land Revenue & Settlement Department chuan an Minister Pu Lalruatkima hovin General Conference Hall-ah kum thar atana inhlantharna leh infuihtharna hun an hmang a. Kum 2022 chhunga Land Revenue & Settlement Department hmalak tawhna thlir ho a ni a, kum thar lo awm tura department in hmachhawp hrang hrang a neihte PowerPoint- hmanga present a ni.

He hunah hian Land Revenue & Settlement Department in Minister Pu Lalruatkima chu Cabinet Minister a nih lawmpuina an hlan nghal a ni.

Minister Pu Lalruatkima chuan ram leilung Pathianin min pe a, chu ram enkawl chu sorkar mawhphurhna a ni a ti a. Hmasawnna engpawh thawk dawn ila land based vek a ni a, ram a awm loh chuan hmasawnna ruhrel a inbun ngheh theih loh a, chuta tang chuan Land Revenue & Settlement Department in mawhphurhna kan nei sang hle a ni tih kan hre theuh awm e tiin a sawi. Revenue Department chuan chhung tin mamawh leh a tel lova awm theih loh, chhungkaw tin file/document kawltu department a nih avangin file vawn that leh document vawnhim chungchangah mawh nasa takin a phur a, hemi kawngah hian a chhunga thawkte chu neitu an ni tih hria a, an mawhphurhna theuha tan la thar leh turin a fuih a. Department rawn dawrtute hi naupang lam aiin upa lam nu leh pa te a tam zawk an nih thin avangin dawhtheihna leh hawih hawmna nena lo dawr zel turin a ngen bawk a.

Minister Pu Lalruatkima chuan LR&S Department hnuaiah dan leh hrai, rules leh act chungchangah hriattur tam tak a awm a, thawktuten chu intuaihriam leh theuh a tan la zel turin a chah bawk a. Technology hmang tangkai thiam apiang an vannei tih hria a, hmasawn tum zel turin a chah bawk a ni.

Kum 2023 chu department a thawktu zawng zawng tan kum tha ni turin duhsakna Minister Pu Lalruatkima chuan a hlan nghal a ni.

He hun hi Pu K.Laldingliana, Director chuan a kaihhruai a, he huna kalte lawmna a nei a. Khatla Bialtu hlui Pastor Pu R. Lallianpara chuan hunserh a hmang a.  Pu C.Lalringliana, Joint Director chuan lawmthu sawiin he hun hi a khar a ni.