3195/2022-2023

Aizawl, the 9th January 2023: Vawiin chawhma khan SCERT Auditorium -ah Er Lalrinawma, SWD Minister chuan Person with Disabilities(PwD) zinga khawhmuh fiah lo leh mit lama harsatna nei bakah Beng lama harsatna nei te mamawh hearing leh visual aids lam khawl semna hun a hmanpui.

Visual impairment leh Hearing impairment mamawh khawl(device) - smartphone, tablet, bengdar leh Universal Braille Kit te hi ADIP Distribution of Aids and Appliances NIEPMD, Chennai leh office of Commissioner, Persons with Disabilities(PwD), Govt. of Mizoram tangkawp ten an sem a ni.

Er Lalrinawma, SWD Minister chuan pianphunga rualbanlo te(PwD) chu sawrkarin a ngai pawimawh tih a sawi a. PwD mamawh leh hamthatna chungchangte sawrkarin a rang lama tihsak tur hma a la thin a ti a. PwD tana thawktute pawh thahnem ngai taka thawk chhunzawm turin a chah nghal bawk.

Mi hlawhtling ni turin pianphunga mi vantlang chung emaw nih kher a ngai lo a. Taksa pian hmangah midangte kan pha kher lo a nih pawhin kan rilru put hmang a dik phawt chuan mi hlawhtling tak kan ni thei a ni tiin PwD te chu a fuih a. An hmanraw thar dawn te chu tangkaipui tur leh an tana hmasawnna thlensaktu ni turin duhsakna a hlan nghal bawk.

ADIP Distribution Program hi Pi Vanlaldiki Sailo, Commissioner, PwD in a kaihhruai a. He hunah hian ADIP scheme kalpui dan chungchangah Pu Stalin Anul Regan D, NIEPMD, Chennai hnen atangin report tawi ngaihthlak a ni. Vawiin ADIP Distribution Camp ah hian mit lama harsatna nei mi 25 leh Beng lama harsatna nei mi 39 ten an mamawh khawl an dawng a ni.