3194/2022-2023

Aizawl, 9th January, 2023 : AIDS Healthcare Foundation (AHF) International Headquarters, Global Office & Corporate Headquarters, Los Angeles, USA hotu lu ber sawmnain January ni 6, 2023 khan Dr R. Lalthangliana, Health Minister chuan AHF International & Corporate office leh AHF ho office leh hmun pawimawh te tlawhin meeting pawimawh tak a neihpui.

AHF Global leaders te hian nikum March thla khan Dr R. Lalthangliana hi Dallas, USA-ah HIV/AIDS dona chungchanga hmalakpui an duh thu te hi sawipuiin, thil tam takah hmalak hona nei zui a ni a. Thawhhona thuthlung (Letter of Agreement) hi Zoram Medical College (ZMC) leh AHF Global Headquarters aiawh- AHF India Cares, New Delhi te chuan September ni 27, 2022 khan an lo ziak tawh a. Hemi hnu hian Mizorama HIV/AIDS hluar zel leh Mizoram in harsatna tam tak a tawhte hmachhawn dan tur te duangin hma lakna hrang hrang kalpui mek a ni a. Tun tumah hian Health Minister hian AHF te International Headquarters, a hmun ngeiah tlawhin inkawmhona te an nei a, hei hian awmze nei lehzuala hmalak zelna kawngah rah tha a chhuah ngei tura beisei a ni.

An meeting ah hian khawvela AHF hotu lu ber, International President Pu Michael Weinstein leh a thawhpuite- Chief of Global Advocacy & Policy Pi Terri Ford, Chief Financial Officer Pu Lyle Honig Mojica, Director of Global Advocacy & Media Pu Sal Gullen, Director of Global Financial Operations leh an hotu pawimawh tak tak te an tel a.

He meeting ah hian thil pawimawh tak tak sawiho niin Minister hian a taka hlawhtlinna hmuh theiha awm tur a thlen te chu-
1. AHF India Cares leh Mizoram sawrkarin thawhhona thuthlung nikum lama an lo ziah tawh chu bawhzuia chak lehzuala hmalak te
2. Mizoram tan technical support leh hmanraw mamawh hrang hrangte ngaihtuahsak rang turte
3. Kan tunlai khawvelin HIV/AIDS a buaipui mek lai hian Mizoram bik a kan harsatnate thuk zawk leh nasa lehzuala min luhchilhpui a, strategy leh approach awmze nei zawka kalpui a tulziate
4. Mizoram sawrkar aiawh (ZMC), AHF leh an thawhpui Palladium Consulting Pvt. Ltd ten thawhhona Letter of Agreement an ziah naa AIDS Epidemic hi kum 2030 ral hmaa tihrem ngei tura ngawrh taka hmalak ni se an lo tih chu chak taka kalpui tul a tih thu te
5. A khat tawka AHF te nen intlawhtawnna leh hmalak dan thlirho va review meeting neih fo thin tul a tih thu te a thlen a.

Global Corporate Office a meeting an neih zawh hian Health Minister hian HIV/AIDS veite an enkawlna hmun clinic, pharmacy leh out-let store-te tlawh lehin henga thawkte nen hian an hmalak dan te an sawiho leh bawk a ni.

AHF hotu te hian Health Minister thu thlente hi an lo ngaih pawimawh sakin theihtawp chhuah an lo tum thu an lo hrilh a. India ram atanga Health Minister-in hetianga an sawmna a ngaih pawimawhzia an hriatin leh an hmunpui ngei tlawh a a kal thei hian rah tha tak a chhuah ngei an beisei thu Minister hi an lo hrilh a.

AHF hotute hian Minister hnenah HIV/AIDS tihremna tur atana a inpekna an ngaihhlutzia leh an chawimawina entirnan “Certificate of Appreciation” an lo hlan a ni. AIDS Healthcare Foundation hi khawvel pum huapa HIV/AIDS dona leh a veite enkawlna kawnga hmalatu lian tak niin khawvel ram 45 ah hmalakna an kalpui mek a ni.