4484/2024-2025

Vairengte, 28th February 2025: Lok Sabha MP Pu Richard Vanlalhmangaiha chuan vawiin khan Vairengte College Campus-a College Lungphum phum inkhawm chu khuallian niin a hmanpui a, Vairengte College Lungphum hi a phum nghal bawk a ni.

He hunah hian thu sawiin Pu Richard Vanlalhmangaiha chuan Vairengte khaw mipuite chu ṭhenawm state nena buaina kan neih chang a ral hma tawnga awm ṭhin, a ṭul huna huaisen em em, khaw mipui inthurual thiam em em leh zirna sang zawk College an neih theihna tura All NGO, sawrkar hnathawkte, political party awm zawng zawngte leh kohhran hruaitute an ṭanrual thiam em em zelna te chu fakawm a tih thu a sawi.

Lok Sabha MP chuan zirna ngai pawimawh mi a dah san thu leh a dah pawimawh thin thu sawiin, sawrkar leh mimal mai bakah, a kohhran ang te pawha zirna lam ngai pawimmawhna kawnga ke kan pen te hi hmuh nuam a tih thu a sawi a, zirna lama hmasawn leh zirna ngaih pawimawh tlatna rilru hi kan Kristianna nen pawh a inmil hle a ni a ti a. Mizoram tana sawrkar laipui sum pawh chhuah thei tur awm ang ang te pawhchhuah tumin a zir chho mek a tih thu a sawi a, a ṭul anga College building sakna tur ngaihtuah dan te pawh a awm chho zel tura a ngaih thu a sawi.

College din a nih hian a buildingah ringawt a tawk zo lova, Sustainability hi ngaihtuah tel a ngai a, a thawktu tur zirtirtu, hnathawk te leh staff tam tak a ngai dawn a. Building nei ngawt ila, thawktu tur kan hmuh zawh si loh chuan building chu a ram mai dawn a ni a ti a. Chief Minister leh Higher & Technical Education Minister te nen ngaihtuah tlangin Vairengte College ṭha tak kan nei thuai ngei ka beisei a ti a. Project pakhat CSR ah an buaipui mek thu pawh tarlangin a lo hlawhtling thei a nih chuan a leh pekte chu a kal zawt zawt turah ngai ila, chungah te chuan he lai hmun hi ngaih pawimawh leh tihhlawhtlin hmasak tur a ni ang, a ti bawk.

He hun hi Pu H.Vanlalbiakzaua, SDO (C), Vairengte in kaihhruaiin, Pu Z Lalremliana Asst.Secy, Governing Body, Vairengte College hnen aṭangin  Technical Report ngaihthlak a ni bawk.