219/2024-2025 

Kolasib dated 16th April, 2024: Vawiin chawhma khan Kolasib district-a Lok Sabha Inthlanna kalpui tur a mipuiin Vote thlak an ngaih pawimawh theih nan Systemic Voters Education & Electoral Participation (SVEEP) kaltlangin Two Wheeler Rally buatsaih a ni a. Pu John LT Sanga, Deputy Commissioner chuan hun kaihruaiin Kolasib khaw chhung a sawrkar pisa hrang hrang a thawktute kawngzawh tur hian lo an tel a, Diakkawnah vote thlak tur a thu tiam lakna hun neih a ni.

Pu John LT Sanga, Deputy Commissioner chuan mipui rorelna tichiang tur leh tichak tur hian vote nei tawh phawt chuan kan vote hmangin kan duhthlanna kan lan chhuah tir a pawimawh thu sawiin rilru leh ngaihtuahna fim tak nen kan aiawh tur thlan chhuahna ah hian kan vote hmangin kan duhthlanna hmang chhuak theuh turin kalkhawm te a chah.

SVEEP kaltlang a vote thlak tur a mipuite zirtirna tur a Kolasib khaw chhung a 2-Wheeler Rally buatsaih a nih bak ah hian Kawnpui Govt. Higher Secondary School-ah Pu Samuel Lalrinawma, Lecturer, SVEEP Resource Person chuan SVEEP Young Voter Awareness Program neih puiin Quiz hmang a inelna kalpui a ni a, lawmman te sem a ni. Kolasibah hian voter 63,830 awm ang a chhinchhiah niin Polling Station 89 buatsaih a ni a. Polling Station-a duty tur hian mi 452 ruat niin PRO 113, APRO 113 leh Polling Official 226-te an ni. 4-Tuirial Assembly segment-ah hian voter 18,433 awmin Polling Station 26 a awm a, 5-Kolasib Assembly segment-ah voter 24102 awmin Polling Station 29-a awm a, 6-Serlui Assembly segment-ah voter 21,284 awmin Polling Station 34-a awm bawk a ni.

Polling Station 89 zingah hian hmeichhe vil Polling Station 10, thalai vil bik Polling Station 1 leh ruah tui khawl pawimawh zia pho lang thei tur a chei, Unique Polling Station 1 siam a ni a, he Unique Polling Station-ah hian intlar ngai lova vote thlak theih turin ruahmanna siam a ni.