220/2024-2025
Aizawl dated 16th April, 2024: Election Commission of India thupek angin naktuk tlai dar 5:00 atang hian Mizoram aiawhtu MP thlanna neih tur atana Campaign hun a tawp ang. April ni 17, 2024 (Nilaini) tlai dar 5:00 atanga vote thlak ni April ni 19, 2024 (Zirtawpni) tlai dar 5:00 thleng, darkar 48 chhung hi Section 126 of RP Act, 1951 sawi angin 'Silence Period' a ni.
He hun chhung hian Television (TV) emaw Electronic Media/Social Media hmanga inthlan kaihhnawih thil tarlan leh tihchhuahte khap tlat a ni.
He hun chhung hian tumahin election kaihhnawih thila mi koh khawm leh thusawite an ti tur a ni lo a. Inthlan kaihhnawih thil television-ah emaw media dangah emaw mipui hmuh theih turin an phochhuak tur a ni lo. Election thila mipui intihhlimna, ennawm leh hlimhlawpna engmah an buatsaih tur a ni lo bawk a ni. He thupek zawm Io te chu kum hnih thleng lungin tan tir emaw, lei chawi tir emaw, a pahniha hrem theih an ni.
He hun chhungah hian Candidate leh Political Party ten Press Conference leh Interview an huaihawt thiang lo a. He thupek zawm Io te chu kum hnih thleng lungin tan tir emaw, lei chawi tir emaw, a pahniha hrem theih an ni.
Advertisement chhuah chungchangah ECI a khauh hle a, Disclaimer (thuchhuaha mawhphurhna lak loh), thuchhuaha tu emaw hming thatna hlawh tir (credit lines) ang chi te hi advertisement nen a kal hrang ngei ngei tur a ni a. Politics kaihhnawih Advertisement mai bakah programme sponsor-nate, report siamte, bulk sms (a hlawma sms thawnchhuah) ang chi te hi tih phal loh a ni a, TV leh Radio kaltlanga mipui rilru sukthlek tidanglam thei ang chi hrim hrim puanchhuah a khap a ni.
Social Media platform hrang hrang i.e., Facebook, Instagram, X, YouTube, Whatsapp, virtual game worlds etc., a political advertisement tichhuak duh chuan ECI emaw State MCMC in phalna an pek (pre-certified) chauh an tichhuak tur a ni.
Silence Period ah hian aurinna hman khap tlat a ni, Vantlang mike (aurinna) emaw lirtheia aurinna vuah a kal kual khap a ni.
Silence Period hman a nih atangin Campaign Period a tawp a, mipuiten rilru fim tak leh ngaihtuahna thiang an lo neih theih nan a ruahman a ni a. He hun hi tha taka zawm a nih theih nan Candidates leh Political Parties te pawh an mahni inthunun tura beisei an ni.
Mizoram pawn atanga lo kal Political Party aiawh leh Candidates tin Campaigner-te chuan Silence Period intan hnuah 1-Mizoram (ST) Parliamentary Constituency huam chhungah vote an nei a nih loh chuan Mizoram an chhuahsan tawh tur a ni.
Election Commission of India chuan National TV/Radio channel emaw Cable Tv network neituten anmahni kaltlanga programme tihchhuah reng rengah, a chunga tarlan tak darkar 48 chhungin an programme a hun changtuten mipuite hnenah political party emaw candidate emaw tan lam hawi zawnga ngaihdan emaw ngenna an sawi lohnan engkim uluk takin an enfelin, an vil tha tur a ni a ti a. Hei hian mipui ngaihdan lak (opinion poll), zir zauna etc., a huam tel vek a ni.
Silence Period chhungin TV, Cable network, Cinema Hall etc., hmang tangkaia political advertisement tih chhuah khap a ni a. bulk SMS/voice messages (a hlawma thawnchhuah) emaw, polling area a aurinna hmang emaw, mipuite en theihna tur hmanraw hmang emaw a political advertisement tarlan phal a ni lo.
State/District level MCMC-in phalna a pe a nih loh chuan Political Party, Candidate, pawl leh mimal tumahin vote thlak ni leh vote thlak hma ni (April ni 18 & 19, 2024) ah print media kaltlangin advertisement an ti chhuak tur a ni lo. Political Advertisement tih chhuah an duh ni atanga chiar leta ni hnih hmalamah MCMC-ah dilna hi thehluh tur a ni.
Election Commission of India thurawn March ni 1, 2024 a tih chhuah angin political advertisement, a bik takin “sky bus advertisement” chanchinthar thupui anga hmanga mipuite rilru kaihruai thei tur chi tih chhuah phal a ni lo. Fakna rawng kai inthlanpuia chak tur hrilhlawkna emaw, Inthlan result ni tur awm anga ngaih theih reng reng tarlan phal a ni lo.
Representation of the People Act, 1951 hnuaia Section 135C chuan zu leh ruihtheih thil hralh emaw semchhuah emaw a khap a, hei hian zu dawr, sipai canteen leh hotel, restaurants etc., a huam vek a ni.
Hemi hun chhung hian mimal anga zu lo lak khawl/chheprelh khauh taka khap a ni bawk.
Hemi hun chhung hian Flying Squad Team, Static Surveillance Team, etc. ten dan bawhchhiatna a awm leh awm loh an fan kual reng dawn bakah Media Certification & Monitoring Committee (MCMC) ten Media leh Social Media te pawh ngun takin an vil reng dawn bawk a ni.
