221/2024-2025 

Champhai, the 16th April, 2024: General Election to Lok Sabha, 2024 atana venhimna kalpui dan chungchanga 1-Mizoram (ST) Parliamentary Constituency viltu Police Observer Pu K. Satyanarayana, IPS chuan vawiin chawhma dar 11:00 khan Champhai a thleng a, Police Observer ho hian DC Conference Hall-ah April 19, 2024 a Lok Sabha Inthlanpui neih tur chungchanga hmalaknate thlirlet niin  hmachhawpte sawiho a ni.

Police Observer Pu K. Satyanarayana chuan Mizoram chu State ralmuang, ram pum tana entawntlak, inthlanna kalpui dan pawh felfai tak a nih thu a sawi a. Inthlan buaipuitute chu inthlahdah phah nana hmang lova ECI inkaihhruaina thuchhuahte tha taka zawm a, an duty theuhte rinawm taka thawk theuh turin a chah a. International border-a awm Champhai District-a enforcemet agency-te hmalakna chhuanawm a tih thu a sawi a. Inthlan kaihhnawih Official pawimawh tak takte chu inthlan a hnaih tawh avangin thawhpui dangte nen tha taka inberawna, hmalak dan tur tha ber sawi hova inrawntlang tam turin a fuih a. Harsatna a awmin thuneitu sang zawka thlen thuai tur leh ECI atanga inkaihhruaina siamte ngaihven reng turin a chah nghal bawk.

Meeting-a tel Nodal Officer leh Sector Officer-te chu mawhphurhna an neih theuhte tha taka vil tur leh chetsualna a awm loh nana theihtawp chhuah turin a chah a. Vote thlak ni ah harsatna an tawh loh nan ruahmanna siam lawk tur leh inbiakpawhna tha tak ruahman turin a chah a. Polling party duty tur chhuah leh dawnsawn chungchangah ruahmanna felfai tak siam lawk a pawimawh thu sawiin, vote thlak tawhna EVM/VVPAT te venhimna khauh tak hnuaiah Strongroom-ah dahluha, tha taka venzui a tul thu a sawi bawk.

District Election Officer Pu James Lalrinchhana chuan Champhai District tlawhtu Police Observer lawmna thu sawiin, kalkhawmte inhmelhriattirna hun a hmang a. Champhai District chu zone 13 a then a nih thu leh a viltu tur Sector Officer leh Sector Police Officer-te ruat an nih thu sawiin, an bial theuhte tlawhin ngun taka an vil thu a sawi a, an tan training pawh zawhfel tawh a ni, a ti a. Polling Station 84 ah voter 57,454 an awm thu leh chawhrualin Polling Station tinah voter 684 awm zel anga chhut a ni, a ti a. PwD voter 296 leh kum 85 chunglam voter 350 an awm thu a tarlang bawk.

Pu James Lalrinchhana chuan Lok Sabha Inthlanpui atan hmeichhe hlang duty-na tur Pink Polling Station 9 bakah thupui neia siam Model Polling Station 3 siam a nih dawn thu a sawi a. A tam thei ang berah webcasting kalpui tum a nih thu sawiin, EDC diltu 705 leh home voting dilna lut pawmsak 134 an awm thu a sawi a. Polling Station-te biakpawh harsa a awm loh thu leh inthlan hma chiah ni (P-1) ah chhuah vek tum a nih thu a sawi a. April ni 15 thlengin political party atangin inthlan campaign kaihhnawih dilna 29 dawn a nih thu leh inthlan puan ni March ni 16 atanga April ni 15 thenga Enforcement Agency, FST/SST/VST te ruihhlo leh thil dang man tlingkhawm zat chu Rs 7,32,75,335 (cheng vaibelchhe sarih, nuai sawmthum pahnih, singsarih sangnga leh zathum sawmthum panga) a tlin tawh thu a tarlang a. DEO hian Police Observer hnenah hian district chanchin kimchang leh District Election Management Plan (DEMP) a hlan nghal bawk.

He hunah hian Champhai SP Pu Vineet Kumar chuan inthlan kaihhnawiha venhimna kalpui dan leh ruahmanna siam hrang hrangte sawifiahin, Zonal Officer 4 leh Sector Police Officer 13 ruat an nih thu a sawi a. Venhimna thawk turin State Police bakah CAPF Company 1 leh Platoon 1 ruahman a ni, a ti a. Border area-a awmte atangin Silai 130 dawn tun a a nih thu a tarlang bawk.

Police Observer hova meeting-ah hian Nodal Officer, Sector Officer leh Election Official dangte an tel a ni.