Vawiin khan DRDA Conference Room, Serchhip P&E Vengah Lok Sabha MP Pu CL Ruala’n Model Village a siam tur a a thlan Khawlailung leh Rajya Sabha MP Pu Ronald Sapa Tlau-in a thlan Chhiahtlang khua te tihhmasawnna tura ruahmanna Village Development Plan thlirhona leh hmalak chhunzawm dan tur ngaihtuahin heng khaw pahnih puala SAGY Sub-Committee din ve ve te an thukhawm a, Chawhma dar 11:00 ah Khawlailung SAGY Sub-Committee thukhawmin Chawhnu dar 2:00 ah Chhiahtlang SAGY Sub-Committee an thukhawm a ni.

Vawiin thutkhawm pahnih hi SAGY Charge Officer Pi Teresy Vanlalhruaii, MCS, Project Director, DRDA Serchhip District ni bawkin a kaihruai a, SIRD kaihhruaina hnuaia February thla a heng khaw pahnih a Participatory Rural Appraisal (PRA) Exercise buatsaih anih hnu a khawtlang hruaitute leh sawrkar Department te thawkhovin khawtlang tihhmasawnna tur Village Development  Plan atana ruahmanna chi hrang hrang an siamte enho niin hmalak dan tur sawiho a ni a, heng Village Development Plan hrang hrangte hi Sawrkar Department malin thawh remchanglo te a awm nual avangin thawhho dan tur te Department kaihhnawih ten lo sawiho a, mahni Department thawh tur chanpual theuh te pawh zirchianga ruahmanna mumal tak siam a, April ni 10, 2015 hma a Charge Officer hnena thehluh tur a rel a ni a, heng ruahmannate hi District Committee ah thlen leh niin District Committee hian State-Level Committee ah a thlen ve leh ang a State-Level Committee  hian Sawrkar Laipui pawmpui turin an thlen ve leh dawn a ni.

Charge Officer Pi Teresy Vanlalhruaii chuan SAGY atan hian pawisa a hranpa hlaka a ruahman a awmloh avangin project siam kawngah pawh uluk taka thawh a ngai dawn a ni a ti a, May 2015 atanga chhiar a thla 12 chhunga Village Development Plan siam te thawk zo vek tura tih an nih thu leh Short-term project anih avangin sum indaihlo tih chhuanlama hman a rem dawn lova, Sawrkar Laipuiin uluk leh chipchiar taka hnathawh dan a vil dawn avangin hun bi tiam chhunga thawh zawh theih chi anih loh chuan Village Development Plan thenkhat phei chu hnawl a ngaih mai theih thu a sawi a, SAGY inkaihhruaina ah chuan khawtlang huap mamawh a bik takin BPL chhungkua ten an chhawr tangkai theih tur project ah insawrbing a ngaih thu a sawi bawk. Village Development Plan hnuaia project ruahman te chu sum sen ngaizat chhutchhuah lawk vek a pawimawh thu a tarlang bawk.

SAGY Guidelines ah chuan Village Development Plan te hi thla 12 chhunga thawh zawh tur a ni a, hun bitiam chhunga zawh hmanloh an nih chuan SAGY kaltlanga hnathawh angin chhiar an ni dawn lo a, kumin October thla hian mid-term assessment neih a ni ang a, October, 2016 ah chuan SAGY hnuaia khua thlanchhuah te hi “Model Village” a puan vek hman tur a ni.