SAGY Programme hnuaia Lok Sabha MP Pu CL Ruala’n model village a siam tura a thlan Khawlailung khua a Village Council ten kum khat chhunga an hnathawh thlirletna leh sawizauna hun vawiin khan Khawlailung BNRGSK Hall-ah neih a ni a, Serchhip DRDA Project Director, SAGY Khawlailung Charge Officer ni bawk Pi Teresy Vanlalhruaii, MCS bakah Pi C.Laltleipuii, MCS, BDO East Lungdar RD Block leh Pu Andrew H.Lalremruata, MIS, DIPRO ten he hun hi an hmanpui a, Khawlailunga hmasawnna hna thawktu Sawrkar Department hrang hrang aiawhte, Political Party hrang hrang aiawhte, NGO aiawhte, kohhran hruaitute leh khawtlang mi pawimawh te he hunah hian an tel a ni.

Khawlailung Village Council ding mek kum khat tlin champha denchhena hnathawh thlirletna hunah hian Charge Officer Pi Teresy Vanlahruaii chuan Village Council ten kum khat chhunga an hmalakna hrang hrang, an pawisa hman dan thlenga mipui hriat a an puangzar ngam chu fakawm a tih thu leh hetianga ti ngam Village Council a vawikhat hriatna anih thu a sawi a, India Sawrkar leh Mizoram Sawrkarin Sawrkar tha leh belhchiahdawl (Good Governance) siam tuma beihpui a thlak mek laia a taka kalpui ngam Village Council an awm chu thilchhinchhiahtlak tak anih thu sawiin an hnathawh tawh te pawh a hriatpui chinah sawiselna tur awma a hriat loh thu a sawi bawk. Pi Teresy chuan tuna kan kalphungah chuan Sawrkar Department te tel lovin hmasawnna a kal thui pui tak tak theihloh a, chutih karah Khawlailung ah erawh khawtlang hruaitute leh mipuiten khawtlang dahpawimawh hmasa ber chungin Sawrkar hnathawkte thawhhona tha tak an neihpui theih avangin hma pawh an sawn hle a ni a ti a, an khawtlang inthurualna chu chhawm nung zel turin a chah a, SAGY Model Village programme hi October, 2016 thleng Khawlailunga kalpui tur anih avangin he programme tawp hnu pawha hlawhtling chhunzawm zel thei tur leh mahni ke a kal thei tura inbuatsaih lawk a pawimawh thu a sawi bawk.

Pi C.Laltleipuii, BDO, East Lungdar RD Block pawhin Khawlailung Village Council te chu hnathawhpui nuam tak leh fel tak an nih thu sawiin midangte tan pawh a entawntlak an nia ti a, Khawtlang inrelbawlna a felfai bakah VC ten an khawtlang dinhmun leh mamawhte an hriatchian em avangin hna thawh a awlsam bakah a chak bik ani a ti bawk.

Pu Andrew H.Lalremruata, MIS, DIPRO pawhin Village Council hruaitute chu fak tlak leh “model” ni a a hriat thu sawiin an enkawl khawtlang mipuite hi midangte tana entawntlak “model” an nih tir reng thei dawn em ? tih chu mi zawng zawngin an hlawhtlinna tehfung atana an hman tur anih zawk avanga thahnemngai thar turin a chah a, Gram Sabha anihna ang tak leh diktaka an hman thin rah an seng ni a a hriatthu sawiin Village Council huaisen, langtlang leh fiah tura mipuite an cho ngam chu fakawm atih thu leh entawntlak atih thu a sawi bawk.

Khawlailung VCP Pu K. Thangbawia chuan kum khat chhunga Pathian kaihhruaina a tluang taka khawtlang hmasawnna hna an thawk thei chu lawmawm an tih avang leh hemi hun chhunga khawtlang hmasawnna atana an hnathawh te mipui leh Sawrkar hriata chipchiar taka puanzar a, an hnathawh dan report te zirchian sak an nih a mipuite leh sawrkar lawmlohna emaw, thahnemngaihna avanga duhkhawplohna bakah hmalak chhunzawm zelna tur atana ruahmanna sawihona hun atan leh thurawn lakna hun atan hetiang hun hi an buatsaih anih thu sawiin engtik lai pawhin khawtlang mipuite ngaihdan leh thurawnte pawh anngaihthlak sak reng dawn thu a sawilang a ni.

Khawlailung khua hi In 502 awmna khua niin chhungkaw 537 an awm a, mihring cheng zat hi 2728 (mipa-1351, hmeichhia-1377) an ni a, Village Council hi May ni 5, 2015 khan ding tanin kum khat chhungin Gram Sabha vawi 3 an nei hman a, Village Council te kaltlangin khawchhungah hmasawnna chi hrang hrang 22 he hun chhung hian thawh niin hemi atana sum hman zat chu Rs. 54,06,000/- a ni a, hemi hun chhung hian Kurtai Kut vawi 2 hlawhtling taka hman a ni a, Village Council te hian an khawchhunga Zirna In, Anganwadi Centre leh sawrkar Pisa awm zawng zawngte tlawhchhuak thinin mamawh leh harsatna te an sawipui thin a, Village Council, Bialtu MLA leh Model Village a thlangtu Lok Sabha MP te hmalakna zarah Doctor, High School Headmaster, Vety staff, Primary School zirtirtu, Store keeper etc. neih thar a ni a, Mizoram Rural Bank Branch Office pawh hawn mai theih tura ruahmanna kalpui mek a ni bawk. Khawtlang faina atan tan nasa taka la in Bazara ah sa sat vek tura Village Council te thupek chhuah pawh mipuiten an zawm tha hle a, Khawlailunga power sub-station bun hna pawh thawh mek niin Forest Department nen tangkawpin model village plantation tha tak nei turin hma an la mek bawk. SAGY programme hnuaiah CSR Project kaltlangin bawlhhlawh paih motor thar pek an ni a, hei hi registration tihfel mek anh bakah chhungkaw 10 hnenah eizawnna bul tan nan Rs. 60,000/- theuh pek an ni a, Hmeiche dinhmun chawikanna programme hrang hrang kalpui anih bakah High School a hman tur Laptop, Projector etc. pek an ni bawk.

Khawlailung khawchhung hmasawnna atan committee peng hrang hrang 15 din ni bawkin heng committee te hian chak takin hma an la reng a ni.

Khawlailung Village Council member te chuan Lok Sabha MP Pu CL Rualate, anmahni bialtu MLA Pi Vanlalawmpuii Chawngthu leh sawrkar Department hrang hrang chungah an thinlung takzeta lawmthu sawiin an khawtlang tana hmasawnna hna thawhte chu a tha thei ang ber leh midangte tan pawha entawntlaka thawh zel an tum thu an sawi bawk.

Khawlailung Village Council din champha vawikhatna lawmpuinan DRDA SAGY Team chuan Computer Set Village Council an pe a, East Lungdar BDO in Printer tha tak a pe bawk a ni.

Attachment

  • Loading attachment...