Vawiin khan Advocates for Zo Nationalism (AZN)-in ramngaw leh nungcha humhalh kawnga thawk tha mi 4 thlan chhuah te hnenah AZN Award 2019, Hotel Regency, Aizawl ah a hlan a, he hun hi Lok Sabha MP Pu C.Lalrosanga'n a hmanpui a ni.

AZL Award 2019 semna-a khuallian ni bawk Lok Sabha MP Pu C.Lalrosanga chuan Mizoram hian mumal leh huam zau zawka Environment Policy a neih a ngaih pawimawh thu a sawi a, hei hi hun rei tak chhunga amah mimal pawhin alo vei tawh anih thu a sawi bawk a ni. Sik leh sa inthlak danglam avang leh chhan hrang hrang avangin Environment humhalhna kawnga ah hian nasa zawka tan lak a ngaih thu a sawi a ni. Lok Sabha MP Pu C.Lalrosanga chuan Citizenship Amendment Bill (CAB) chungchangah Hmarchhak state MP ten Prime Minister, Home Minister leh Minister pawimawh dangte an sawipui tawh thu a sawi a. CAB hi sawrkar laipui in kaltlang pui a tum a nih pawhin Hmarchhak state te chu huam tir ve lo tura an ngen tawh thu leh a kaltlang pui dawn anih chuan state sawrkar hotute nen pawh in rawn khawm se an duh thu te an lo thlen tawh thu a sawi a ni.

AZN Award 2019 semna ah hian Pu Lalsawmliana (LPS Vision) chu khualzahawm a ni a, thu sawiin sik leh sa inthlak danglam vanga mihring khawsakphung a in thlak nasat tawh zia te a sawi a ni. Khualzahawm chuan tun aia nasa zawka hemi kawnga ke pen turin kalkhawm mipuite a chah bawk.

AZN Award 2019 hi ramngaw leh nungcha humhalh leh enkawl kawnga thawk tha  pawl leh mimal hnenah hlan a ni a, chungte chu Mizoram Environment and Forest Conservation Forum (MEFCOF), JB Paws, Pu C.Lalhmingthanga, Rimaw Ram leh Pu H.Lalhmunsiama, Nungchate Thian hnenah hlan a ni.