No.6588/2020-2021

Vawiin khan Lok Sabha MP Pu C.Lalrosanga'n Model Village atana thlan Damparengpui a tlawh a, khawtlang hruaituten lo dawngsawngin BNRGSK Hall, Damparengpui ah inkawmna an nei.

Lok Sabha MP Pu C.Lalrosanga in SAGY hnuaia model village atana kan thlan Damparengpui khua a tlawh thei chu lawmawm tiin, khawtual miten an lo dawnsawn danah lawmthu a sawi a. MP chuan model village atana Damparengpui kan thlan takah chuan, khaw dangte tana kawng hrang hranga entawn tlak ni turin hmasawnna hrang hrang leh nunphungah theih tawp mite enkawn tlak ni tura, tan la turin a ngen a, model village atan hian a hranpa in scheme a awmlo nain CSS hmangin a theih ang chin chinah nasa taka hma lak tum a ni tiin a sawi. Heta tan hian village development plan te duangin, kawng hrang hrangah hmasawnna ruangam tha tak din tum a ni dawn a, chu tiang atan chuan khaw mipui te pawh in rilru lo in puahchah turin a sawm a ni. Model village atan hian Bialtu MLA leh sawrkar department hrang hrangte nen tangkawpin hma lak tur a nih thu a sawi bakah ramri dep anih avangin BRO ten kawngpui an enkawl mek hi chak zawka thawh a nih theih nan Union Defence hnenah a ngaih pawimawh thu ziakin a lo thawh thu a sawi bawk a ni. India Sawrkarin hnam tlem zawk leh tezawk te a ngaih pawimawh angin, helai bialah chutiang mite tan hmasawnna kawngah theih ang ang hma lak a nih tur thu a sawi bawk.

MP tawiawmtu Bialtu MLA Pu H.Lalzirliana pawhin thu sawiin, Lok Sabha MP in Damparengpui a tlawh vawi khatna a nih rualin model village atana a han thlang leh zel te hi khaw mipui tan chhinchhiah tlak tak a ni, a ti a. Hmasawnna lamah helai bial hi a hnufum hle a, zirna in leh  dawmdawi in enkawlna kawngah  hnufum tak meuh meuhin tan nasa taka lak a ngaih laiin Damparengpui model village atana thlan a ni hian hmasawnna bul a in tan chho dawn niin a hriat a ni, tiin a sawi.  Hmasawnna thawk tur chuan mipuite kan in buatsaih a, khawtlanghruaitu leh mipuite lungrual taka kan thawh ho a ngai a, chutiang tur chuan kan chet velnaah hmasawn zawngin kal kan tum tur a ni, a ti bawk.