No.6587/2020-2021

Vawiin ni 18.11.20 khan Agriculture Minister Pu. C. Lalrinsanga hovin ATMA, (Agricultural Technology Management Agency), Review Meeting neiin, kum 2019-20 leh 2020-21 chhunga an hnathawhte, an hmalakna leh hmachhawp te, kut hnathawktuten District hrang hranga harsatna an tawhte leh AgricultureTechnology hmanga heng an harsatnate hi sutkian dan tur bakah Mizorama kut hnathawktuten State chhung mai nilo, State pawn lam thlenga Market linkage an neih theih dan turte sawiho a ni bawk.

Minister Pu C. Lalrinsanga chuan Mizoram a kan loneitu tam berte hi tlangram lo nei mi an nih avangin ATMA leh KVK kaltlang a farmer te zirtirnaah pawh tlangram lonei mite chhawr tangkai theih tur zawn a pawimawh thu a sawi a. ATMA hnathawktute pawh kut hnathawktute hmakhua ngai taka thawk a, hlawh lak nan maia hnate hmang lova kan thawhchhan ber kuthnathawktute tana theihtawp chhuah a tul thu a sawi a.

He meeting ah hian State Agricultural Management and Extension Training Institute (SAMETI) hnathawh dan leh ruahman te sawi ho niin, awmze nei zawk a skill development training programme kalpui chhoh dan tur leh Agri & allied graduate te tana mahni a bul an tan theihnan- scheme AC&ABC (Agri Clinics & Agri Businness Centre) kalpui chhoh dan turte sawiho ani bawk.

Agricultural Technology Management Agency (ATMA) hi District Level-a Agriculture leh a unau dept. Horticulture, AH & Vety, Fisheries, Sericulture, Soil & Water Conservation sector huam chhunga kut hnathawktute zirtirna (direct extension works) pe tura din ani a. Ministry of Agriculture & Farmers Welfare chuan Central Sponsor Scheme lian tak “Support to State Extension Programmes for Extension Reforms (SSEPERS)” chu ATMA hmanga kalpui tur hian rem a ruata; Mizoram ah chuan Agriculture Department in ATMA hi hlawhtling takin a kalpui mek a ni. Agriculture leh a kaihnawih zirna in leh Research hmun pui viz., ICAR/KVK ten an thil hmuhchhuah te chu ATMA kaltlangin kut hnathawktute hnenah thlen leh chhawpchhuah thin a ni. Tunah hian India ram district 676 ah ATMA hi a thawk mek a ni. ATMA scheme hnuai tho a din SAMETI hi Agri and allied depts. zawng zawng tana intuaihriam (capacity building) training leh skill development-a State Level training institute a ni.

He hunah hian Agriculture Director (R&E) Dr. H. Saithantluanga leh Technical officials dangten an tel bawk a ni.