Vawiin khan New Delhi-a Parliament Library ah Parliament a political party hrang hrang hruaitute meeting neih a ni a. Prime Minister Pu Narendra Modi a hova MP te thutkhawmnaah hian Mizoram Lok Sabha MP Pu C.Lalrosanga chuan naktip a parliament budget session tan turah hmarchhak state te sum mamawh ngaihpawimawh nise a duh thu a sawi.

Hmarchhak bial state te tana central sawrkar Ministry leh Department hrang hrang hnuaia budget sum zaa 10 dah thin chu a nihna ang taka hman a tul thu a sawi a, he Grosss Budgetary Support, 10 % dah hi hman mumal loh avanga tlingkhawm a tam tawh avangin a rang lama zâi taka hman ngei a tul a ni tih sawiin, Pu C. Lalrosanga chuan Sawrkar Laipui budget hi kum tharah hmarchhak state te tana tihpun a nih ngei a beisei thu a sawi bawk. Hei bakah hian Act East Policy hnathawh dan a chak tawk lo hle ni a a hriat thu sawiin chak zawka kalpui turin Sawrkar Laipui chu a ngen bawk a ni.