Vawiin hian BNRGSK Hall, P&E Veng Serchhip ah Rural Development Department hnuaia thingtlang hmasawnna tura sawrkar hmalakna Scheme hrang hrang enkawltute tan “District Level Sensitization Workshop on Various RD Schemes” neih a ni.

Khuallian, District Programme Co-ordinator, RD leh District Bawrhsap ni bawk Dr. Lalzirmawia Chhangte, IAS chuan Rural Development Department chu thingtlang miretheite dawmkang tura hmalatu ber an ni a, chumi atana sawrkar Scheme hrang hrang te an enkawl a. Heng Programme leh Scheme te a hlawhtlin pawh an kovah a innghat tih hre chunga, tih takzet leh taima taka an thawh t ul tih a sawi a. Serchhip District chu Mizo hlang awm khawmna, Mizoram ram laili anih avangin engkimah entawn tlaka kan thawh a tula a hriat thu a sawi a ni. Hnathawktute tana hetiang hun tha buatsaih nachang an hria chu lawmawm a tih thu sawiin, chhawr tangkai ngei tum turin kalkhawmte a ngen a ni.

Pu Vanlalhmachhuana, BDO Serchhip hnen atangin RD Scheme hrang hranga hmalakna kal mek leh; hnathawktute hriattur pawimawh hrang hrangte ngaihthlak niin, Pi Vanlalhruaii, State Nodal Officer, Monitoring Information System (MIS) hnen atangin report ngaihthlak anih bakah, MNREGS chungchangte, mirethei in sak sakna PMAY-G te, IWMP leh MzSLRM hnuaia Serchhip District chhunga hmasawnna hnathawh kal lai mek leh hmachhawpte zirho a ni a, zawhna leh chhan te, sawiho ngaite sawiho na hun hman a ni bawk.

He hun hi Pu Dolianbuaia, MCS, Project Director, DRDA Serchhip chuan a kaihhruai a, District chhung khaw hrang hrang atanga hnathawktu kalkhawmte lawmna thu sawiin, inhmelhriatirna hun a nei a. Rural Development Department atanga mi harsa in sakna scheme – PMAY ah Serchhip District in pakhatna dinhmun an hauh thu leh Serchhip RD Department ten SARAS Fair 2019 ah lawmman an lak thu te a sawi a ni.

He hunah hian Pu Lalhruaitluanga, BDO E.Lungdar RD Block, Pu Vanlalhmachhuana, BDO Serchhip RD Block bakah DRDA Serchhip Office a thawktute, Serchhip RD Block leh E.Lungdar RD Block huam chhunga Assistant Programme Officer (APO), Technical Assistant (TA/JE), Village Level Administrative Assistant (VLAA) te bakah Administration Staff te an tel a ni.