No.1080/2021-2022

Aizawl 22nd June 2021: Vawiin chawhnu dar 3:00 khan Lok Sabha Speaker Pu Om Birla hoin India rama Dan siamtu pawl (Legislative Body) hrang hrangten video conference kaltlangin meeting an nei a.  Mizoram atangin Er. Lalrinawma, Deputy Speaker hovin Mizoram Legislative Assembly-a Officer pawimawh ten Assembly Secretariat Committee Room atangin meeting ah hian an tel a ni.

He inhmuhkhawmnaah hian Lok Sabha Speaker chuan kum hnih kalta chhunga India Parliament-in ram tana hna a thawh pawimawh tak takte sawi chhuakin Covid-19 hripui leng karah Covid Appropriate Behaviour zawm chunga Parliament-in ram tana a thawh tur hrang hrangte khaihlak awm lova thawh a nih dan a sawi a. Hri a leng chung pawhin hun hmasa lam aiin hnathawh a tam zawk a ni, a ti.

Mizoram atanga he hun hmangtu Er. Lalrinawma, Deputy Speaker pawhin kum hnih kalta chhunga Mizoram Legislative Assembly-in hna a thawhte sawi langin Covid-19 hrilengin eng emaw chenah harsatna siam bawk mahse Assembly hna erawh chu tluang taka kalpui zel a nih thu a sawi a. Covid-19 dona atana Sawrkar, Kohhran, NGO leh mipui thawh hona a thain a chhuanawm takzet tih a sawi a ni.