No.1079/2021-2022

Dated Serchhip, the 22nd June, 2021: Vawiin hian Serchhip DC Meeting Hall ah Bawrhsap Pu Kumar Abhishek, IAS hovin Serchip khawpui chhunga Village council tin aiawhte, tlawmngaipawl leh chanchibumi aiawhte leh Medical lam hotuten Serchhip a Covid19 Vaccine pek mek chak zawka kalpui dan tur an rel.

Pu Kumar Abhishek chuan, covid19 hrileng mek laka mipuite kan himna tura hmalakna pawimawh ber pakhat chu vaccine lak hi a ni a. Serchhip District mipui, vaccine la thei chin zawng zawngten kan lak zawh vat chuan he hri lakah hian kan him duak (herd immunity) thei dawn a ni. Tunah hian nitin Serchhip Main Centre ah leh district chhunga Centre dangah te vaccine hi pek reng a ni a, district te hote zingah a la tha ber pawl pawh kan niin a lang. Amaherawh chu tun aia chak hian vaccine hi la sem chhuah theih a ni a, thawktute pawh an inpeiha, hmanrua pawh kan nei a. Vaccine pekchhuah hi Covid19 dona kawnga hna pawimawh tawpkhawk a nih avangin vawiinah chutianga kan kal theih nan chuan ruahmanna kan neih a ngai a ni, tiin an inkohkhawm chhan a sawifiah hmasa a. Dr. Lalhlunpui’in Vaccine pek mek kalpui dan leh Online Registration kalpui a ngaih dante a tarlang bawk.

Vawiina thukhawmte hian, Serchhip khawpui chhunga Village Council sawm leh palite chu ni indawta Serchhip Main Centre a vaccine lak theihna hun hawn sak ni se, vaccine la turte online registration hi veng chhung VLTF leh YMA ten a tul ang zelin vaccine la turte lo pui bawm se, an ti a. Vaccine la turte hian online registration an tih tawh chuan online bawka a hun tur hauh lawk (time schedule) kha chu vaccine pekna hmun Main Centre ah pawh lo tihsak mai ni se an ti. Tin, veng tinten an veng vaccine lakniah an VLTF leh YMA te chu Centre pui tu tur nei thei tura beisei an ni bawk.

Vaccine la tha ber VLTF te hnenah lawmpuina hlan ni se tiin rawtna an siam bawk.
Veng indawta vaccine lak hi dt. 24th June, 2021 atanga kalpui tan tur a ni a, veng indawt dan tur hi duan fel a nih hnuah veng chhung Information Mike hmanga inhriattir a ni ang.

Pu Kumar Abhishek chuan, mipui vaccine la thei chinte te chu vaccine la vek turin a ngen a, covid19 hripui laka Serchhip District kan hima kan invent theihna tha ber chu mipui zawng zawngten vaccine kan lak theuh hian a ni tih hriaa mahni veng lak hun theuhvah lak ngei tum vek turin a chah a ni.

Attachment

  • Loading attachment...