No.192/2021-2022

Vawiin chawhnu dar 3 khan Lok Sabha Speaker Pu Om Birla chuan India rama State leh Union Territory zawng zawnga Legislative Assembly leh Legislative Council Speaker leh Chairman te video conference kaltlangin meeting a ko a. Mizoram Legislative Assembly Speaker Pu Lalrinliana Sailo bakah Deputy Speaker Er.Lalrinawma, Parliamentary Affairs changtu Minister Pu TJ Lalnuntluanga bakah Opposition Group Leader Pu Vanlalhlana te pawh meeting ah hian an tel a ni.

Pu Lalrinliana Sailo chuan Mizoram COVID-19 dinhmun sawiin sawrkar hmalakna hrang hrang a tarlang a. Mizoram MLA ten COVID-19 dona tura an hlawh atanga sum engemawzat an lo thawh tawh thu te sawiin MLA te leh sawrkar hmalakna piah lamah tlawmngai pawl te, kohhran te leh mipuiin COVID-19 dona kawnga an thawhhlawk zia meeting-ah hian a sawi a ni. Speaker chuan ram chhunga COVID-19 a len tan tirh, kum kalta khan ram pum lockdown a nih hma hauhin Mizoramah lockdown puan a lo nih tawh thu te, nikum March thla laihawl atang tawha Rapid Antigen Test hmanga ram ri luhka zawng zawnga test kalpui a lo nih tawh thu a sawi bawk a. Amaherawhchu, vanduaithlak takin COVID-19 hrileng thawhhnihnain India rampum a tuam mek laiin Mizoramah pawh case a pung chang ta hle tiin Speaker Pu Lalrinliana Sailo chuan COVID-19 second wave dona kawngah Mizoram Sawrkar chu nasa takin a inbuatsaih mek a ni, a ti.

Lok Sabha Speaker Pu Om Birla kaihhruai he meeting-ah hian State leh UT tin aiawhin mi pakhat zelin thu an sawi a ni.