No.485/2020-2021

Aizawl, the 21st April 2020 : Lok Sabha Speaker Pu Om Birla chuan vawiin khan State leh UT zawng zawnga Legislative Assembly Speaker-te chu video conferencing neihpui in Covid-19 hripui dona kawnga an state theuh Sawrkar hma lakna leh Covid-19 dinhmun te a sawipui a. Mizoram Legislative Assembly Speaker Pu Lalrinliana Sailo pawh he hunah hian telin Mizoram dihmun leh harsatna te a sawi a ni.

Lok Sabha Speaker chuan Sawrkar Laipui leh State Sawrkar zawng zawng te theihtawp an chhuah zarah Covid-19 chu mipui nawlpui ah a taihdarh (Community Transmission) nia a lang lo chu lawmawm tiin engmaw chen a darh nasa tur hi a hun taka inkharkhipna kalpui in a dang a ni, a ti a. Speaker te chu an state theuha, chin dan tha best practices an kalpui mek te chu sawi tura sawmin Assembly zawng zawnga MLA te chu a thei ang anga mipui harsatna te chu sutkian anih theih nan theihtawp chhuah zel turin a ngen a ni.

Pu Lalrinliana Sailo chuan Chief Minister Pu Zoramthanga kaihhruai Sawrkar in Covid-19 dona kawnga chak taka hma a lak dan te sawiin Covid-19 dona kawnga Sawrkar in Kohhran, tlawmngai pawl leh Task Force te thawpui dante pawh a tarlang a. Speaker chuan Mizoram mi leh sa state danga tangkhang mek te chu lo ngaihven a, a thei ang anga lo tanpui turin Speaker-te a ngen hlawm a. Speaker chuan MLA zawng zawngte an Bial theuhah State dang mi tangkhang an awm leh awm lohte ngaihven a, a theih ang anga lo tanpui turin All India Presiding Officers Conference hminga MLA te a ngen thu pawh Lok Sabha Speaker hi a hrilh a ni.

Video Conferencing ah hian All India Presiding Officers Conference (AIPOC) kum 100 tlin lawm chungchang leh AIPOC Conference vawi-80 neih tur chungchang pawh sawiho a ni.

Ni hnih kalta khan Lok Sabha Speaker Pu Om Birla chuan Mizoram Legislative Assembly Speaker Pu Lalrinliana Sailo chu phone ah bia in Mizoram dinhmun leh hmalakna te a lo ngaihven a ni.