568/2023-2024
Champhai, the 25th May, 2023: Nimin khan District Agriculture Office, Champhai buatsaihin Champhai Zotlangah khawl hmanga buh phunna tur hmanruate loneitute hnenah sem chhuah a ni. He hun hi Champhai Bawrhsap Pu James Lalrinchhana chuan khuallian nia hmanpuiin hmanruate loneitute kutah a hlan a ni.

Khuallian Pu James Lalrinchhana chuan Champhai zawla loneitute’n sum leh tha an sen leh an thar chhuah inmil ta lo chu insiamrem a ngaih thu sawiin, ‘Mihring tha kan hmanna thinah khawl a tam thei ang ber kan hman a ngai tawh a ni, a ti a. Hmanrua a thlawna an dawn chu bultanna tereuhte angin lang mah se, hlawhtlinna ropui tak thlentu a nih theih thu a sawi a. Agriculture Department-in buh chauh ni lo, kum khata thlai vawi hnih thar chhuak thei tura hma an lakna chu a hlawhtlin theihna tura theihtawp chhuah turin loneitute a sawm a. Awlsam zawka tui neih theihna tura leihnuai tui verh chhuah chuan nghawng tha lo a nei thei em tih zirchian hmasak a pawimawh thu a sawi bawk.

Agriculture Department chuan Loneitute’n sum seng tam lo zawka buh an thar chhuah theihna turin khawl hmanga buh phunna tur hmanrua chi hrang hrang, buh chi kuina tur Tray, Leveler, Frame leh Seeder an sem a. Heng hmanruate hi Zau hrang hrangah sem niin Phaizau zauah 1400, Luangdarh zauah 600, Zote Tiau zau I-ah 225, Zote Tiau zau II-ah 300, Mualbuhbum zauah 250, Thingmaldin zauah 400, Pumphir zau Farkawnah 200 leh Saikhumphai zau Vaphaiah 350 te an sem bakah Loneitu hnathawk tha mi 5 thlan chhuahte hnenah an pe chhuak bawk a. Hmanrua bakah hian loneitute hnenah hian pawisafai cheng nuai 7 leh sing 8 sem chhuah a ni bawk.

Loneitute puala hmanraw sem chhuahna inkhawm hi Pi R.Lalramhluni, DAO Champhai chuan kaihruaiin kalkhawmte lawmna leh fuihna thu a sawi a. Pi V.Lalhriatpuii, BAO, Champhai Block-in hmanraw hman dante a lem nen a tarlang bawk a ni.