567/2023-2024

Aizawl 24th May 2023: Vawiin khan Tuikual High School chuan MBSE- in HSLC result a tihchhuaha hlawhtlinna changte lawmpuina ‘Graduation Day’ Tuikual South YMA Hall-ah an hmang a, he hunah hian Information & Public Relations Minister Pu Lalruatkima chu khuallian a ni.

Khuallian chuan zirlai hlawhtlinna changte a lawmpui tih a sawi a, zirtirtute leh zirlaiten theihtawp an chhuahna rah a ni, a ti. Zirna chu thiamna leh finna petu, mi ropui leh thiltitheia mihring siamtu a nih avangin zirlaite chu uar zawk a lehkha zir leh chhhiar thin turin a chah a ni. Mizo pi leh pute hunah khan zirna ngaipawimawh khua chu khaw nuam leh chhenfakawm an ni thin a, zirtirtute chu khawtlang ngaihsan leh rawn ber te an ni, a ti a; tunlaiah chuan nunphung te lo inher danglam ang zelin ngaihsan zawngte a inthlak nasa hle ni a a hriat thu sawiin ngaihsan tur diktak ngaisang thar leh turin zirlaite chu a chah a ni. Khawvel hi ‘a ruh no no chhuakah’ tihna ram a nih tawh avangin ruhno tan chuan beisei tur a vang hle a ni a ti a; zirlaite chu theihtawp chhuaha zirna ngaipawimawh thar turin a fuih bawk. Hlawhtlinna sang zawk chang turin chanchinbu leh lehkhabu lam chhiar nasat a ngaih thu tarlangin chanchinthar te en tam turin zirlaite chu a chah a ni. Sawrkar hnain mi zawng zawng a daih thei dawn lo a ni tiin sawrkar hna chauh ni lo eizawnna dang tam tak a awm tih hria a, eng hna pawh thawk thei tura rilru siam tur leh thiamna tak tak nei tura theihtawp chhuah a bei zel turin zirlaite chu a chah a ni.

I&PR Minister, bialtu MLA ni bawk chuan thangtharte zingah nu leh pa zahna a tlahniam hle ni a a hriat thu sawiin zirlaite chu an nu leh pa te hlut zia hrethar a, nu leh pa zahna kawngah tan la thar turin a fuih a. A bik takin thalaite zingah aia upate zahna chuan hniam lam a pan mek zel tih sawiin hei hi thil pawi tak a ni, a ti. Aia upa zah hi Mizo nun zemawi tak pakhat a ni tih tarlangin pi leh pu atanga Mizote nuna bet tlat aia upa zah leh thuawih chu kaihthawh thar a ngai tih sawiin, aia upa te zah a, nu leh pa chawimawi thiam turin zirlaite chu a fuih a. Nu leh pa mittui tlak tir fo tu leh khawtlang duh loh leh huat ber zu leh ruihhlo laka fihlim tlat turin zirlaite chu a fuih nghal bawk.

Pu Lalruatkima chuan kum 1952 atang khan India chuan ‘Family Planning’ kalpui tanin Mizoramah ngei pawh fa neih tlem inzirtirna uar taka kalpui a nih thu a sawi a, Mizoram dinhmun ngaihtuah erawh chuan fa neih tam a ngai hle thung a ni, a ti. Khawvelah tam a pawimawhzia a takin hmuh mek a ni tiin Mizote zingah fa neih tam a ngai a, chumi tur chuan nupui pasal pawh a hma lamah neih a ngai a ti bawk. Mizoramah kumtina nau piang zat atanga chhut chuan reiloteah hnam anga ral a hlauhawm a ni tiin fa neih tam lamah harh thar a ngai hle a ni, a ti. Social Media-in Mizoram a run nasa hle tih tarlangin a bik takin zirlaite zingah Social Media hman chintawk hrelo an tam hle a ni, a ti a. Zirlai tibuai thei zawnga hmang lo tur leh mahni zirna atan tangkai chin bakah chuan Social Media-te khawih tam lo tur leh fimkhur taka hmang thin turin zirlaite a chah a ni. Khawvelah inelna a sang tawh hle a, dam khawchhuak turin theihtawp chhuah a ngai a, thawhrimna tello chuan dinchhuah a har tawh hle tiin zirlaite chu thawkrim a, uar leh nasa zawka an zirlaite zir tura fuihin sang zawk an thlen theih nan duhsakna a hlan nghal a ni.

Pu David L.C. Chhakchhuak, Headmaster, chuan report a pe a, kumin HSLC result chhuakah khan Tuikual High School atangin candidate 65 an awm a, zirlai 48 ten hlawhtlinna changin tun dinhmunah zirlai 155 an nei mek a ni.

Vawiin Tuikual High School ‘Gradutation Day’ a zirlai hlawhtlinna chang te hnenah hian lawmpuina thuziak (Certificate) leh Chest pin-te hlan a ni a. Zirlaite lawmpuina inkhawm hi Pu H.Rammawi, Chairman, Tuikual High School Managing Committee chuan kaihruaiin, Pu Biakthanzama, Vice Chairman, High School Managing Committee chuan lawmthu sawina neiin hun a khar a ni.