Vawiin khan Mizoram kuthnathawktute puala hun siam Farmers’ Meet 2014 chu Vanapa Hall-ah Agriculture Minister Pu R. Lalzirliana hovin hman a ni a. Loneitu thawktha thlanchhuahte hnenah lawmman hlan nghal a ni bawk. He hun, Agriculture Department Principal Secretary Pu Lalram Thanga kaihruaiah hian Parliamentary Secretary Lt. Col. (Rtd.) Z. S. Zuala leh Planning Board Vice Chairman Pu Liansailova ten hmanpuiin, Agriculture Department (Crop Husbandary) Director Dr. C. Lalzarliana’n agriculture-a Mizoram dinhmun leh hmasawnna te a tarlang a ni.
Agriculture Minister chuan Mizoramin buh leh bal thar kawnga hmasawnna kan hmu zel chu lawmawm a tih thu sawiin, tunlai thiamna hmanga mihring tha tam tak hen, chak zawk leh hlawk zawka thawh theihna khawl te hman tangkai a nih zel chu hmasawnna duhawm tak a ni, a ti bawk. Buhfai thar tam vanga Sorkar laipuiin kumtin lawmman a sem thin, cheng nuai 25 keng tel Krishi Karman Award chu kum hnih chhung Mizoramin a lo dawn ve tawh chu lawmawm a tih thu sawiin, loneitute taimak rah anih bakah, Ministry hmasa a Agriculture Minister hmalakna avang te pawh ani, a ti a. Hmasawnna kawng kan zawh mek naah hian, thil hrang hrang buaipui lawr lovin, thil pakhatah nghet leh taima taka bur chat turin kuthnathawktute chu Minster chuan a chah a. Sorkar pawhin theihtawp chhuahpui a inhuam thu a sawi bawk a ni.
Vawiin Farmers’ Meet-ah hian buh leh thlai thar tha leh ATMA hmalakna hnuaia tithazual te hnenah lawmman Citation leh pawisafai sem a ni a. Lawmman hi Chief Guest bakah Planning Board Vice Chairman Pu Liansailova, Parliamentary Secretary Lt. Col (Rtd) Z.S.Zuala, Agriculture Department Principal Secretary Pu Lalram Thanga, Agriculture Department (R&E) Director Pu C. Lalniliana leh Agriculture Department (Crop Husbandary) Director Dr. C. Lalzarliana ten an hlan a ni.
He hunah hian AMFU, Oil Palm Growers’ leh WRC buh thar tam aiawh ten thu an sawi bawk a. Parliamentary Secretary Lt. Col. (Rtd.) Z. S. Zuala chuan lawmthu sawiin hun tawp a hmang a. A bik takin loneitute leh Department mi leh sate thawhrimna chu fakawm tiin, nasa zawka hmasawnna hmuh zel theih a beisei thu a sawi a ni.
Agriculture Department in a tarlan danin kum 2012-2013 chhung khan Mizoramin buhfai 57,700 MT a thar chhuak a. Agriculture Department hnuaia NLUP beneficiary chu mi 19,911 an awm a ni.
