Vawiin chawhma dar 11:00 khan Serchhip DC Meeting Room-ah March ni 7, 2014 a Serchhip-a “Chapchar Kut” lawm dan tur ngaihtuahin Chapchar Kut Organising Committee an thukhawm.

Art & Culture Department atangin Serchhip-a Chapchar Kut hmanna tur atan Rs. Nuaih 1hmuh a ni dawn a, Chapchar Kut hi P&E Veng, Serchhip-a “Leisekawt” khelmual ah hman tur a ni ang; Kut lawmdan tur programme leh items zawng zawng chu Sub-Headquarters YMA, Serchhip in a ruahman ang a, Chapchar Kut hmanna tur pawisa pawh hi a vaiin an kutah hlan a ni ang.

Sub-Headquarters YMA hruaitute chuan sawrkarin Serchhip-a Chapchar Kut lawmna programme an kuta a nghat thin chu lawmawm an tih thu sawiin kumdanga harsatna an tawh thin dan te an sawi a, kum hmasa lamah pawh Rs. Nuaih 1 a Chapchar Kut huaihawttu a an lo tan tawh thu leh, pawisa hi a tlem thu te, leiba an ngah phah thu te, inthlahrung tak chungah sawrkar department hrang hrang hnena vehbur khawn a ngaih phah thu te an sawilang a ni.

Sub-Headquarters YMA, Serchhip in Chapchar Kut 2014 hman dan tur an duan lawk chu Chapchar Kut hman anih hma hun remchang hmasa berah Bawrhsap hovin ennawn leh a ni ang a, Chapchar Kut hman zawh ah Review Meeting neih a ni bawk ang.

Vawiin inkhawm hi Pu Lalsangliana, MCS, Addl. DC, Serchhip in a kaihruai a, Sawrkar pisa hrang hrang aiawhte leh Sub-Headquarters YMA, Serchhip hruaitute an tel a ni.