Ni hnih awh tur National Health Mission (NHM) 3rdquarter review meeting, April atanga December,2013 chhunga hmalakna thlir letna chu vawiin khan Directorate of Health Services Conference Hall, Dinthar-ah neih a ni a, Pu Lal Thanzara, Helath Minister chu Khuallian niin he hun hi a hmanpui.

He meeting hi Pi Esther Lalruatkimi, Health Secretary-in a kaihruai a, kalkhawm te lawmna thu a sawi a ni.

He meeting-ah hian Health Minister chuan thawktute tawiawmna leh tanrualna avangin thil tha tamtak an chin chhuah theih a beisei thu sawiin, department hnathawktute chu hrilhriat leh bengvar a ngaihna laia pui thin turin a sawm a. Millenium Development Goal pariat zing a; nausen thi tih tlem te, HIV beihna kawnga tanlak te leh Malaria tihrem kawnga tanlak te chu ngaihpawimawh lehzual a tul thu leh tanlak a tul thu a sawi a. Doctor te chu an hna uluk lehzual leh inpekna tak tak nen a thawk tura chahin, an hnuaia thawkte vil uluk tur leh an bialchhung tlawh chhuak tha turin a chah a, khawtlang hruaitute thawhpui thiam turin a chah bawk. Health Dept. chu mi tana malsawna leh damna thlentu department an ni tih in hriaa, rawngbawlna rilru pua thawk sauh sauh turin a fuih a ni. Health Minister chuan hlawh ringawt en lova, mahni hna a lungawi tak leh rinawm taka thawk te chu an nun a hlimin an huaisen sawt thin tih sawiin, hna tuichilh turin kalkhawmte a chah a ni.

He meeting-ah hian Dr. R.Lalthanga, SPO,RCH chuan Nu naupai hriselna lam leh nausen natna leh thihna ti tlem tura hmalak dan tur thlir hona leh tun aia chak zawk a hmalak dan tur sawi hawnna a nei a. Dr. Gordon Zohmingthanga, Mission Director, NHM pawhin NHM kalpui mek dan leh hmalakna tur awm te leh tanlak ngaihna lai te a sawi hawng bawk.

Report-a a lan danin April atanga December, 2013 chhungin Mizoram pumah nu nau chunga thi mi 10 leh nausen kum khat hnuailam thi 473 an awm a ni.

Sorkar laipui kum 2012 Sample Registration System Survey-in a report danin India ramah nausen kum 1 chhunga nau piang 1000 zelah nausen thi 42 zel an awm laiin Mizoramah chuan thi 35 zel an awm a ni. April atanga December, 2013 chhunga Mizorama naupai chhinchhiah zawng zawng zat chu 14,825 niin, naupiang 16,156 an awm.

Mizoram pumah nu nau nei zinga 89% chu damdawiina nau nei (safe delivery) niin, damdawiina nau nei hniamna ber Lawngtlai District-ah 62% an awm laiin, a sanna ber Aizawl District ah 98% an awm a ni.

April atanga December 2013 chhungin Reproductive & Child Care Programe (RCH) hnuaia Janani Suraksha Yojana (JSY) programme atangin naupai/nau nei tanpuina dawng zat mi 11761 leh Janani Shishu Suraksha Karyakram (JSSK) atanga damdawiin a nau nei senso tumsak zat mi 1308 an awm tawh a ni.

He review meeting-ah hian District hrang hrang atangin report ngaihthlak niin, sawihona hun neih a ni bawk. Naktuk lamah pawh review meeting hi chhunzawm leh a ni ang.