Rural Development Minister Pu R.Lalzirliana leh Parliamentary Secretary Lt.Col.(Rtd) Z.S.Zuala hovin vawiin chhun khan RD Conference Hall ah RD Officer te an thukhawm a, mipui chawikan nana RD-in kawng hrang hranga hma a lakna te thlirhovin harsatna an tawh te chinfel dan tur te an sawiho bawk.

Minister Pu R.Lalzirliana chuan RD Officer te mawhphurhna pawimawhzia sawiin thingtlang mi berh te te ten mual eng an hmuh phak ve nana thawktu an nih thu a tarlang a, an thawh that leh thatloh ah Sorkar hming a tha-in a tha lo thei a ni a ti a. Hlawh lak nan chauhva sorkar hnathawk an awm thin chu pawi a tih thu sawiin Minister chuan RD Officer te chu sorkar neitu tak tak an nih hre renga taihmakna leh inpekna nen mipui tana thahnemngai taka thawk thin turin a chah bawk.

Parliamentary Secretary Lt.Col.(Rtd) Z.S.Zuala pawhin fuihna thu sawiin RD Officer te chu mipui hne hnai ber an nih avanga an kovah Zoram hmasawnna nasa takin a innghat a ni tih hria a, taima tak  leh thahnemngai taka thawk zel turin a chah a, thingtlang mi te tana an hmalakna leh hnathawhna hrang hrang te uluk taka vil thin turin a chah bawk.

Vawiin RD Officers meeting hi RD Secretary Pu R.Lalvena’n a kaihruai a, Mizoram District hrang hranga Project Director, DRDA leh Block Development Officer te bakah RD Directorate leh Secretariat Office-a Officer te an tel a ni.