Aizawl Bawrhsap Office chuan eirawngbawlna gas harsatna tihziaawmna tura Aizawl district chhunga sawrkar hmalakna a tarlang:
Dan kalh a LPG gas hralh a awm thin nia hriat a nih avangin hemi titawp tur hian Aizawl District administration leh Police te chuann theihtawp an chhuah a.
Kumin August thla khan LPG cylinder 92 man a niin a neitu nia hriatte pawh Essential Commodities Act hnuaiah Show Cause Notice pe in, confiscation order chhuah a ni a. Hemi hnua Aizawl District hmun hrang hrangah dan lo va hralh tur nia hriat LPG cylinder man zawng zawng nen a vaiin bur 175 man a ni tawh a ni. Hetianga dan lo va eirawngbawlna gas hmanga sumdawnnaa inhnamhnawihte hi Essential Commodities Act, 1955 leh LPG (Supply & Distribution) Order, 2000 hnuaiah kum sarih (7) thleng lungin tan theihna a nih bakah gas bur te leh a phurtu motor te hi confiscate theih a ni.
Eirawng bawlna gas hi mitin ten kan kawt kaia kan dawn theih tura ruahman a ni a. Indian Oil in ruahmanna a siam dan anga IVRS/SMS/Online booking hmanga online booking ti tute chu ni hnih atanga ni thum chhunga pek tura tih a ni a. Hei hi mipuite tan a awlsam bakah dan kalh a eirawngbawlna gas hmanga sumdawnna tihbona kawng pawimawh tak a ni.
