A bial fanga zin mek Food Civil Supplies & Consumer Affairs Minister Pu John Rotluangliana chuan Phaileng ah public meeting neiin PAHAL-Direct Benefits Transfer for LPG(DBTL) Consumers Scheme chungchang a sawifiah.
He scheme hi India ram district 54 ah November 2014 khan hman tan a ni tawh a, India ram pumah January 1, 2015 atanga hman tan tura tih a ni. LPG consumer zawng zawng tan thla thum chhung hriatthiamna hun (grace period) pek belh an ni a. Thla thum ral hnuah parking period pek leh an ni ang. Minister chuan sorkar laipui Petroleum & Natural Gas Ministry duh dan angin Mizo mipuite subsidy a gas (LPG) la duh zawng zawng, Aizawl khawpui chhung leh thingtlang lam pawhin a rang lama he scheme hi lo zawm tur leh March 2015 hma ngei a Bank Account te hawng a form te tifel vek turin Gas Consumer zawng zawng te a ngen a ni.
Sorkar-in buhfai man a tihsan chungchanga mirethei leh harsa zawkte rawkna ang hiala sawi awm chungchang a sawifiah bawk a. Kum 2002 atang khan FCI chuan buhfai man hi tum 6 a san tawh a, FCI atanga leina hnuhnung ber hi quintal khatah Rs.2981 a ni a, tuna economic cost a kg1 cheng 15 a ni chung hian sorkarin mipui tana subsidy a pek chu Rs.10.75 a la ni, Pu John Rotluangliana chuan a ti a. Central in tisang lova Mizoram sorkarin buhfai man a tisang zawk anga sawi awm pawh thil hriatsual vang a nih loh chuan hriat tlem vang a ni, a ti.
