Mizorama LPG leh POL sem dan leh kaihhnawih hrang hrangte sawiho in vawiin khan Food, Civil Supplies & Consumer Affairs Department Secretary Dr. Franklin Laltinkhuma kaihhruaiin Mizoram Legislative Assembly Secretariat Conference Hall-ah meeting neih a ni a. He hunah hian Sorkar hnathawk Department hrang hrang ami te leh Local Council Association, CYMA, MCU leh Gas Distribution Association hruaitute an tel a ni.
Vawiin meeting-ah hian hmun hrang hranga LPG siam danglam leh khawih chingpen awm thin chu a lo ziaawm theih nana hmalak dan tur te, LPG Consumer-te cash subsidy dawng thalo engemawzat la awm ten mumal zawk an dawn theih dan tur ngaihtuah leh, khua leh veng zawng zawngah rualkhai taka LPG sem a nih theih nana hmalak dan tur te sawiho a ni a. POL chungchangah black market-a hralh leh pawlh dal a khawih chingpen thin la awm chu khuahkhirhtute lamah thawktu indaihlohna awm mahse, awmze nei zawk tura hma lak theih dan tur sawiho a ni bawk.
Uluk taka an sawiho hnuah vawiin thutkhawm chuan tun hnaia Gas khawih chingpen awm chu a awm zel loh nan hetiang hian resolution an pass a ni :
1. Veng tin a Gas Distribution Point-ah gas cylinder hi buk vek a ni ang. Buk tling lo chu a distributor ten an la let leh ang a, Company-ah an thawn let leh tur a ni. An thawn letna lehkha copy hi Supply Department hnenah an pe ang a, Buk tlinglo chu customer-te hnenah sem theih a ni lo vang.
2. Gas Distributor ten a transporter-te hnen atanga gas an dawnin uluk takin an buk ang a. Distribution point-a buk tlinglo hi distributor-te mawh a nih avangin uluk takin gas bur-te hi buk se he meeting hian a ti a.
3. Dan in a phut anga India ram hmun danga an tihdan angin Advance Booking etc. hi Pilot Project angin veng pakhatah enchhin nise ti a rel a ni.
LPG chungchanga Dan dinglai Marketing Discipline Guidelines 2014 for LPG Distributors-a a lan dan chuan:
1. Gas bur phurh hi bottling plant atanga distributor-te Godown inkar zawng chu a Transporter-te mawhphurhna a ni.
2. Distributor ten Transporter-te hnen atanga Gas bur an dawn fel hma in a buk tlin leh tlin loh leh a him dam dan uluk takin an enfiah tur a ni. Dan ang chuan 10% tal an check tur a ni a. An dawn fel hnu chuan buk a tling lo emaw him dam lo emaw a awm chuan Distributor-te mawh a ni tawh a ni.
