Disaster Management and Rehabilitation Department hmalaknain Saiha leh Lawngtlai District Hazard Risk Vulnerability Analysis (HRVA) chu peihfel a ni ta a. Vawiin chawhnu khan heng lehkhabu pahnihte hi DM&R Minister Pu C.Ngunlianchunga’n a pisaah a tlangzarh.
Minister chuan Lawngtlai leh Saiha HRVA chu a nih dan tur ang taka hmanga, District mipui leh sawrkar pawhin tangkai taka an chhawr ngei a beisei a. Chhiatna leh vanduaina rapthlak thleng mai thei leh tute nge tuar thei tih chauh tarlang lovin hmasawnna ruhrel thar bunna tur hmun leh insakna tur hmun him leh him lo enna tur te, district development project reng reng ruahmanna kawnga kaihruaitu tangkai tur atana buatsaih a ni, a ti. Pu C.Ngunlianchunga chuan he lehkhabu tlangzarh tak hi a tangkai thei ang bera mipuiin an hman theih nan a puanzar leh thehdarh kawngah tan la turin Lawngtlai leh Saiha District aiawh mi pawimawh lokal te a chah a. Tlawmngai pawl leh kohhran ang pawha in zirtir a pawimawh tiin HRVA chu tangkai taka an hman ngei theih nan duhsakna a hlan a ni.
Saiha leh Lawngtlai District Hazard Risk Vulnerability Analysis (HRVA) te hi ATI Disaster Management Cell Head Faculty Dr.Lalrokima Chenkual buatsaih a ni a. Lehkhabu chungchang sawifiahin District pahnih chhunga khuarel chhiatna eng ang nge thleng thei a, chungte chu tu ten nge tuar thei tih te, khawi hmunah te nge a thlen theih tih te, lo thleng palh ta se eng ang chin nge kan tawrh theih ang tih te, lo hmachhawnna turin eng ang hmanrua leh thiamna nge kan neih tih te thlenga uluk taka zirchian a nih hnuah tarlan a ni, a ti.
He lehkhabu chhunga map leh data pawimawhte hi tunlai thiamna leh hmanraw changkang chhawr tangkaiin Remote Sensing leh Geographic Information System technology hmang a duan a ni a. Saiha leh Lawngtlai District chhung a hmun pawimawh bik damdawi in te, sawrkar hmun pawimawh te, helicopter tum hmun leh rikrum thulha tum tir theihna tur khelmual te, rikrum thulha hman tur hmanrua leh bungraw tangkai te tarlan a ni bawk.
HRVA hi Aizawl District tan siam ni tawhin District panga dangte tan pawh siam tum a ni. HRVA tlangzarh inkhawm hi DM&R Secretary Pu Zothankhuma’n a kaihruai a, Mara Autonomous District Council (MADC) Executive Member Pu K.Hrahmo leh Lawngtlai Autonomous District Council (LADC) Executive Member Pu Laltlawmlova Chinzah ten thu an sawi. DM&R Director Pu C.Lalpeksanga, Geology and Mineral Resources Director Pu Lalhmachhuana, Lawngtlai leh Saiha DC aiawhte leh mi pawimawh dangte pawh programme-ah hian an tel a ni.
