No.4439/2021-2022
Aizawl, 29th March, 2022 : Vawiin khan Convention Centre, Lungleiah Pu Lalruatkima, Minister of State, Land Revenue & Settlement (LR&S), I&PR, etc. chuan Lunglei District a hman tan turin, huan, lo, ram kaihhnawih document-te Information Technology (IT) hmanga dah thatna leh chhinchhiahna tur, Computerization of Registration, National Generic Documentation System a hawng.

Hawnna inkhawm ah hian HPC Vice Chairman Pu Lawmawma Tochhawng, LR&S Director Pi Angela Zothanpuii, Lunglei DC & District Registrar Pu Kulothungan A, LR&S Board Member Pu Zion Lalremruata leh District official-te, Lunglei MJA, party hruaitute, tlawmgai pawl aiawhte leh khawtlang hruaitute an tel.

Computerization of Registration hi Sawrkar Laipui hmalakna niin a Software hi Department of Land Resources, Ministry of Rural Development hmalaknain NIC, Pune design a ni a. ‘One Nation, One Software’ tura duan a ni. Cloud based Server-ah Document registration te chu uluk tak a vawn that niin Mizoram chu India ramah he software hmang thei hmasa parukna kan ni a, NE states zingah pahnihna kan ni bawk. He hmalakna hi ram chhinchhiah fel mai bakah Registration Fee leh Stamp duty thlengin a tangkai hle dawn a ni.

Land Revenue & Settlement Minister Pu Lalruatkima chuan tunlai thiamna hmanga lehkha pawimawh hrang hrangte rukruk, kangmei leh chhiatrupna dang thleng thei laka vawn that a tul thu sawiin hemi kawnga huan, lo, ram kaihhnawih lehkha pawimawh vawn thatna tur ’Computerization of Registration’ hmang thei tura hawn a ni chu lawmawm a tih thu a sawi. In hmun leh ram sawrkara chhinchhiah leh chutiang lam kaihhnawih thil tinrengte awlsam zawkin mipuiten kan ti thei tawh dawn a, kan hmunhma lehkha pawimawhte Computer hmanga vawn vek an ni tawh dawn a, in hmun lei leh hralh thuah te, document bo thu ah te thlengin he hmalakna hian nasa takin min ti phuisui dawn a ni, a ti. LR&S Department chu mipui dawrtu nei ngah berte zing ami niin an hna a hautak em em a, hei hi mipuite pawhin kan hriatthiam pui a ngai takzet a ni tiin thawktu kalkhawmte pawh mipui dawrtute dawhthei taka lo dawngsawng zel thin turin a chah nawn bawk.

A sawi zelnaah Pu Lalruatkima chuan Lunglei Municipal Council (LMC) din na kawngah sawrkarin theihtawp chhuahin hma a la mek zela, hei hi Lunglei khawpui hmasawn zelna tur leh khawpui ruhrel changtlung zawk kan neih theihna tur a ni a. Lunglei mipute chu he hmalakna phur taka lo tawiawm tur leh LMC hlawhtling taka kalpui anih theihna turin sawrkar finchhuah leh thawhho pui turin a sawm a ni.

He huna khualzahawm Lunglei HPC Vice Chairman Pu Lawmawma Tochhawng chuan Computerization of Registration Lunglei District tan hawn a ni chu hmasawnna mellung pawimawh tak a ni tiin LR&S Department-te thawhrimna chu chhuanawm a tih thu a sawi a. Aizawla thawn buai ngai lova ram kaihhnawih document-te Lunglei atanga pek chhuah ve theih dan kawng ngaihtuah sak turin LR&S Minister chu District mipuite aiawhin a ngen a ni.

Vawiin program hi Lunglei Settlement Officer Pu Alan Lalthanzara’n a kaihruai a, Pi Maria Lalramchhuani, GIS Consultant, DILRMP chuan Technical Report a pe a ni.

Lunglei Sub-Registrar a thawktu turte chu an mamawh hmanruate chhawp an nih tawh bakah training te pawh pek vek an ni tawh a. Online Document Registration ti duhte tana online Address chu igrmizoram.nic.in a ni.

Mizoram chhunga Stamp & Registration hna hi kum 2013 thleng khan Law & Judicial Department-in enkawlin 27th September, 2013 atang khan LR&S Department kutah dah a ni a. Director LR&S chu Inspector General of Registration niin District tinah Deputy Commissioner chu District Registrar niin Settlement Officer-te chu Sub Registrar an ni. Indian Stamp Act 1899 leh The Registration Act, 1908 te behchhan a hmalak thin a ni.