No.4438/2021-2022
Aizawl, 29th March, 2022 : Vawiin khan Sialkal Range Development Council (SRDC) hnuaia Council meeting chu an Chairman Pu L. Thangmawia, MLA kaihhruaiin SRDC Cell Office, Venghlui, Aizawlah neih a ni.

Sialkal Range Development Council Meeting-ah hian thu pawimawh hrang hrang rel a ni a, chung zingah chuan - Zirlai rethei, an zirna kawnga hlawhtlinna nei tura tanpuina pek ngai tanpui leh mimal thiamna bik nei an thiamna tipung tura puih dan tur dap ni se tih te, Ngopaa Youth Development Centre sak zawh tawh chu SRDC enkawl tura dil ni se tih te, Paite Zirlai Pawl (Siamsinpawlpi -SSPP) ten zirna tihhmasawnna kawnga an hmalaknaah tanpuina mumal taka an hmuh theih dan dappui ni se, Social Welfare Dept in Paite Tribal Hostel, Luangmual, Aizawla a sak chu enkawl hna dil ni se tih leh Vaikhawtlang H/S leh Hrianghmun H/S te mamawh zualpui phuhruk nan Grant In Aid atangin nuai 1 ve ve pek ni se tih an rel bawk a ni. SRDC headquarters, Mimbung khaw rama Manipur leh Mizoram inrina lui Tuivaiah lei (bridge) dawhna tur pawisa SEDP kaltlanga Mizoram sorkarin pawisa a pek avanga lawmawm an tih thu resolution siamin an pass bawk a ni.

SRDC huamchhungah tun dinhmunah hian khaw paruk (6) - Mimbung, Teikhang, Hrianghmun, Kawlbem, Selam leh Vaikhawtlang awm mekin, Headquarters chu Mimbung a ni a, Cell Office Aizawl Venghluiah a nei a ni.

Council memberte zingah hian SRDC huamchhunga MLA pahnih (2), 21-Lengteng (ST) A/C leh 23-Champhai North (ST) A/C te an tel a. 21-Lengteng (ST) A/C hi SRDC Chairman a ni a, heng bakah hian a huamchhung khawtin VCP te chu member an ni bawk a, SDO (Civil), Ngopa chu Member Secretary a ni a. SRDC Cell Office, Venghlui, Aizawlah hian Development Officer a thu bawk a ni.