Land Revenue and Settlement Minister Pu Lalruatkima chuan vawiin tlai khan Surveyor Training Institute dinna tur hmun Hualngohmunah a tlawh.


Surveyor Training Institute dinna tur hmun hi Revenue Department chuan kum 2006 khan mimal ram lei khawmin 24.22 bigha a zau ram a nei fel tawh a. A hmunhma hi khawl hmanga laihzawl a nih hnuah sak tan hleih theih lohvin kum tam tak dah a ni a. Surveyor hna thawk thei tur mamawhna a san hle rualin Mizoramah zirna hmun a awm loh avangin he hna dil thei tura training chhuak an awm mumal thei ta lova. Sawrkar chuan Surveyor Training Institute din hi a tulzia hriain LR&S Minister Pu Lalruatkima hovin vawiin khan department hotute chuan a sakna tur hmun hi an enho a, chak leh zuala hma lak dan tur an sawiho a ni. 

 

Tun dinhmunah Surveyor hna ruak sanction post 45 a awm a. Thawk lai mekte pawh District tinah DC office-ah te dah an nih tel bawk avangin indaihlohna a nasa hle niin Department hotute chuan an sawi. Minister Pu Lalruatkima chuan Institute hi din a nih theih nan thuneitu sang zawkah te pawh a tul dan anga thlen a tum thu a sawi a ni. Surveyor Training Institute dinna tur hian cheng vaibelchhe sawmpanga (15) chu 15th Finance Commision-ah dil mek a ni.

 

Minister Pu Lalruatkima hi LR&S Director Pu K.Lalhmingliana, Joint Director Pu Rinzamlova te bakah officer leh thawktu dang ten an tawiawm a ni.