Vawiin chawhma khan Land Resources, Soil & Water Conservation Department(LR,S & WC) office-ah Thelret hnai dan leh sawngbawl dan zir tura Thelret chingtu zinga mi 50 thlanchhuah te pualin programme tawi buatsaih a ni a. Programme tawi neih a nih hnu hian helai hmun atang vek hian LRS&WC Minister Pu R.Lalzirliana chuan Exodus Rubber Society Training Centre, Khamrang rama kar khat chhung Thelret hnai dan leh sawngbawl dan zir turin Rubber chingtu mi 50 te chu a vailiam nghal a ni.

LRS&WC Minister Pu R.Lalzirliana chuan Mizorama Thelret chingtu zinga tam takin hunrei tak chhung tha leh sum senga an nghah puitlin tak, Thelret Kung tam tham tak hnai theihin a lo puitling ta chu thil lawmawm tak a ni tih a sawi a. Thelret chingtute thawhrimna chuan Mizoram tan sum leh paiah hmasawnna a thlen dawn bakah mi tam tak tak eizawnna pawh a siam chho ngei dawn bawk a ni a ti. Minister chuan kum hmasa lamah Guwahati lamah Batch 2 tirh an lo ni tawh naiin Mizo tawng ngeia kuthnathawktuten thiam thil an zirchhuah tha tih zawk a nih avangin kumin atang chuan Mizoram chhungah Thelret chingtute chu training pek an ni tawh zawk dawn a. Thelret chingtute pawhin an hlawkpui hle beisei a ni a ti. Thelret hnai tur a tam chhoh tawh vangin rubber chingtute chu batch khat zela siamin training pek chhunzawm an ni dawn tih a sawi a. Thelret chingtute tana an plantation phal taka lo hman tirtu, Exodus Rubber Society te chungah lawmthu sawiin an inpekna chu ram hmasawnna atana inpekna thuk tak a ni a ti. LRS&WC Minister Pu R.Lalzirliana chuan Thelret chingtute leh chin tum te tan pawh a enkawl department, LRS&WC chu a inhawng zau tih sawiin Thelret hnai sawngbawlna tur Rubber Processing Unit 100 pawh chawkluh a ni tep tawh a ti a. Thelret huana hman tur hmanraw hrang hrangte pawh sawrkarin lei a tum leh meka heng hmanruate hi man tlawm zawkin thelret huan neitute hnenah pek chhawn a ni leh dawn a ni a ti. Pu R.Lalzirliana chuan Mizote hi ‘Hnam Taima’ kan la ni renga, kawngdik sawrkar atanga kawhhmuh kan nih phawt chuan Rubber a ni emaw huanthlai dangah te pawh kan hlawhtling dawn tih a chiang em em a ni a ti a. Thelret chin thuah pawh Thelret chingtute chuan mithiamte thurawn ngai pawimawh tur leh anmahni enkawl tur sawrkarin hlawh neia a chhawr sawrkar mithiamte pawhin phur takin kuthnathawktute chu a pui a ngai bawk a ni a ti.

Tun tuma Thelret hnai leh sawngbawl dan training programme hi Mizoram Rubber Planters’ Association(MIRPA) leh LRS&WC tangkawpa buatsaih a ni a. Training chhimtur te puala programme tawi buatsaih hi Pu Hualthanga Chhakchhuak, Director, LRS&WC in a kaihruai a. He hunah hian Er Valbuanga, Secretary, LRS&WC pawhin fuihna thu a sawi bawk a ni.

Report a tarlan dan chuan tun dinhmunah Mizoramah Thelret huan nei mi 4207 awm mek nia ngaih a ni a. Heng Thelret chingtute zinga mi 1300 vel chu MIRPA member an ni. MIRPA chhut dan chuan tunah hian Thelret kung nuai 15 bawr vel a ding mek a; heng zinga kung nuai 2 chuang zet chu hnai rual an ni tawh a ni.

Attachment

  • Loading attachment...