Vawiin khan Commerce and Industries changtu Minister Dr R. Lalthangliana chuan India leh Bangladesh insumdawn tawnna hmun tur Integrated Check Post (ICP), Kawrpuichhuaha hmalakna kal mek a hmunah kalin a enfiah. Minister hi Lunglei HPC Vice Chairman Pu Lawmawma Tochhawng, Bamboo Development Board Vice Chairman Dr K. Pachhunga, bialtu MLA Pu Nihar Kanti Chakma, Commerce & Industries Director Pu J.Hmingthanmawia, Lunglei CMO Dr. Thani Pachuau leh official dangte leh party hruaituten an tawiawm a ni.

Tlabung to Kawrpuichhuah kawng siam that leh laih zau hna kal mek thawktu ABCI Infrastructures Private Limited leh a hna viltu MPWD thawktuten Minister hi Kawrpuichhuah ah lo hmuakin hmalakna kal mek leh hmachhawpte an sawiho a. Tlabung to Kawrpuichhuah kawng siam mek hi 11.85 kms a thui niin 2 Lane NH Standard a laih zau leh siam that mek a ni a. He kawng hi World Bank sum hmanga siam niin September 2016 khan thawh tan a ni a. A project cost chu cheng vaibelchhe 83 a ni a. ABCI Infrastructures Private Limited-a Project Manager Pu RK Singh-in Minister hnena report a pek danin tun dinhmunah 74.77% hna zawh fel tawh niin culvert siam ngai 98% zawh fel tawh a ni. Tlabung to Kawrpuichhuah kawng chu ICP Kawrpuichhuah ti puitling turin a pawimawh takzet a ni tiin Minister chuan contractor leh PWD-te chu an hna uluk leh thahnemngai taka kalpui tur leh a hun tiama zo hman ngei tura tan la turin a chah a ni.

ICP Kawrpuichhuah atan hian kum 2005 khan M/s Rites Ltd. ten Home Ministry hnenah an survey report thehlutin he ICP dinna tur hian ram 224.99 bigha a zau acquire a ni a. India leh bangaldesh inkalpawhna ti awlsam tur hian Kawrpui lui (Theka) ah RCC Double Lane Bridge siam tum a ni bawk a. He RCC Bridge siamna tur hian Mizoram PWD chuan Sawrkar Laipui Ministry of External Affairs ah Rs. 230.01 crores hu DPR chu thla hmasa January 17, 2020 khan anlo thehlut tawh a ni. He RCC Double Lane Bridge hmang hian awlsam zawkin Indo-Bangaldesh insumdawn tawnna kalpui theih a ni dawn a, sawrkar laipuiah bawhzui mek a ni. 

Minister leh amah zuitute hian Tlabunga Border Trade Facilitation Centre hmun an tlawh bawk.