2407/2026-2027

Aizawl dated 28th September 2026: Mizo Territorial Army batch hmasa ber, Mizo thalai 144-te chuan tunah hian Gorkha Training Centre, Shillong leh Corps of Military Police Training Centre, Bengaluru-ah Traning an nei mek a. Training hi hlawhtling taka an neih zawh hnuah Mizoram district pathum; Aizawl, Lunglei leh Champhaiahte awm chhunzawm tura ruahman a ni a. MLA Lt. Col. (Retd.) Clement Lalhmingthanga chuan Aizawl District-a Territorial Army awm lailawkna hmun, Bung Bangla, Zemabawk a tlawh a. Lt. Col. Goldi Bora, Commanding Officer, PWD Project Division iii, PWD Road North Division-a thawktute leh Zemabawk khawtlang hruaituten MLA hi an tawiawm a ni.

MLA Lt. Col. (Retd.) Clement Lalhmingthanga chuan Mizo Territorial Army awm lailawkna, Bung Bangla, Zemabawk chu Mizo Territorial Army Batch hmasa berte Training zawh hmaa awmna tlaka a hmunhma buatsaih vat a tul thu a sawi a. He lai hmun hi Officer 5 vel leh Army 50 vel awm theihna tura thawmthat a ngaih bakah, vantlang kawng tawm lova, heti lai hmun panna tur bik kawng siam a pawimawh thu a sawi bawk a ni.

MLA hian Territorial Army Camp Site-a tlawhna ah hian Territorial Army-te chu inkhuahkhirhna khawng tak hnuaia enkawl tur an nih avangin mipui vantlang nena intlawh pawh loh a pawimawh thu a sawi a. Hemi tur hian Entry leh Exit-a Security Post siam dan turte, Entry Parking Space ruahman dan turte endikin, Building awmsa thawmthat dan tur leh Fuel Storage Facility bun dan turte a endik a. Camp Site panna tur kawng siam dan turte pawh PWD lam hotute nen endik nghal niin, a rang thei ang bera zirchianna neih a, hmalak a pawimawh thu sawi a ni.