Aizawl Luangmual Veng chuan kum 100 a tlin lawmna, Centenary Celebration vawiin khan Luangmual Field-ah an hmang a, Chief Minister Pu Lal Thanhawla chuan a hmanpui.

Chief Minister chuan kum 100 hi mihringte nunah hun rei tak a ni a, he kum 100 chhunga harsatna lian tawk lova he hun an chuangkai thei chu Pathian-a an innghah avang leh A kaihhruaina vang a ni a ti a. Pathian hnena lawm nachang an hria chu a lawmawm hle a ni a ti. Chief Minister chuan Luangmual chu ei leh bara intodelh thin tak an ni tih a hriat phak thu sawiin, fai lamah pawh veng fai nih lawmman tum 3 dawng thei an nihnate chu lawm a phu ve reng a ni a ti a. Mizote hi faina lamah kan changkanglo hle a, zuk leh hmuam kan uar avangin kan bang leh ban te chu chinai tah nan kan hmang a, hmui leh ha sen sung chungin mi kan kawm bawk a, a zahthlak hle a ni a ti a. Ei leh ina kan inthlahdah avangin hnam hrisel lo ber ah kan insiam a, cancer tamna ber ram kan ni hi a chhuanawm loh hle a ni a ti. Ringtu kan nih angin hnam hrisel ber awm tak, inbihchianga, a chhelai siam thatu ni theuh turin tan kan lak angai a ni a ti. Ei leh bara intodelh bawk turin ngaihtuahna thar siam a, taimakna leh tumruhna nen tan la thar turin mipuite a sawm a ni.

He hun lawmna denchhena khawtlang hruaitu ten mamawh an thlente chu Chief Minister chuan sorkar chuan kan zavaia that tlanna tur, rampum huapa hmasawnna a kalpui thin thu leh mimal, chhung khat leh veng bil anga tumah tih sak a neih ngai loh thu a sawi a. An mamawhte chu kan that tlanpuina tur anih chuan a tahtawla la tih a ni ang a ti.

A huho-a thisen pek, mass blood donation ti tan tu veng nia an in sawiah, Chief Minister chuan fakawm a tih thu a sawi a. Chhuan lokal leh zel turte tana veng nuam, veng fai, veng thlakhlelhawm an nih zel theihna turin tha thlah lova tan la sauh sauh turin veng kalkhawmte chu a chah a. Ngaihtuahna fim hmang chung zela kal chho turin a duhsakna a hlan a ni.

Luangmual hi kum 1912 September ni 8 ah Bawrhsap W.M. Kennedy (Hnarkula) phalnaa din tan a ni a. Sailo lal rorelna hnuaia awm thin niin, lal hnuhnung ber Raltawna Sailo (L) nupui Hranglianvungi kum 88 mi chuan he hun hi a hmanpui ve a ni. Centenary lawmna hi September ni 8, 2012 atang khan Bialtu MLA Pu Lalduhawma hovin infiamna, veng tihfai hnatlang, thisen pek leh cultural nite te in hman a ni a. Kum 100 tlin hriatrengna lungphun feet 46.5 a sang Community Hall bulah siam a ni bawk. Tunah hian Luangmualah hian in 652 leh mihring 3228 awm anga chhut a ni. Centenary lawmna hi ruai nen veng mipui zawng zawngin an lawm a ni.