World Health Organisation in khawvel pum huapa zunthlum vei te ni, World Diabetes Day a puan chu khawvel hmundang te rualin vawiin khan Aizawlah pawh Mizoram Diabetic Society huaihawtin Aizawl I&PR Conference Hall-ah inkhawm leh free clinic te neih a ni a, Mizoram Rajya Sabha MP Pu Lalhmingliana’n a hmanpui a ni.

Inkhawm hi Director Health Services leh Diabetic Society President ni bawk Dr Ramfangzauva’n a kaihruai a. Khuallian Rajya Sabha MP chuan he ni pawimawh tak rawt chhuah a nih dan te, 2007 atang khan kum tin November 14, zunthlum damdawi tangkai tak insulin hmuchhuak tu pianchamah hman thin a nih dan te a tarlang hmasa a. Mizoram chhunga he natna buaipuiawm tak zunthlum vei te inzawmkhawm pawl 2008 a lo ding tanin hma an lak dan leh he natna chimawm tak laka invenna hrang hrang an kalpui dan te chu fakin tun aia nasa a uar lehzuala kalpui a tul thu a sawi a ni. Pu Lalhmingliana chuan zunthlum natna hi disease zingah telh ve tul a tih thu te, telh a nih chuan he natna vei sorkar hnathawk te pawhin inenkawlna man an bill let theih dan tur leh Health Care-ah pawh natna vei te senso a phuhruk sak a beisei thu te sawiin Mizoram sorkarah chak lehzuala nawr a duh thu a sawi a. He natna chungchang inhrilh hriatna zau zawk kalpui a tul thu te, chanchinbu leh media lamah te pawh uar lehzuala puanzar pawimawh a tih thu a sawi bakah he society tana chhenfakawm zawk sum peipun dan ngaihtuah nise a duh thu a sawi a ni.

Vawiin inkhawmah hian Dr Zoramthanga chuan “Diabetes natna chung chang leh a kaihhnawih” tih thupui hmangin thu a sawi a. Zawhna leh chhanna hun te hmangin chawhnu lamah free clinic buatsaih a ni bawk.

Tun dinhmunah Mizoram Diabetic Society-ah hian member 800 zet an inziaklut tawh a ni.