2473/2024-2025

Dated Hnahthial the 10th October, 2024: Vawiin khan Hnahthial District Fisheries Development Office leh Hnahthial YMA Venglai Branch tangkawp chuan Khuaili kam, Tuichangah lui nungchate leh sangha thlah pun hun chhunga man khapna - 'Observance of Closed Season' hawnna hun hman a ni.

He hunah hian District Fisheries Development Officer, Pu George Lalnuntluanga chuan kalkhawm YMA member-te hnenah thu sawiin sawrkar hmalakna hnuaia hetiang hun hman theih a ni chu lawmawm a tih thu a sawi a. Lui dung humhalhna chang kan hre chho zel chu lawmawm a tih thu sawiin chumi anih rual chuan sangha kan man nasa lutuk thin chu veiawm a tih thu a sawi a. Mizoram Sawrkar chuan Autonomous District Council tih lohvah chuan lui leh a chhunga cheng nungchate hi a humhalh tlat thu sawiin phalna (license) tel lo chuan tuman lui sangha leh luia cheng nungcha dangte chu an man thiang lo a ni a ti a. Danin a phallohte chu chhiar chhuakin dan bawhchhiate hremna chu a tarlang a. Lui nungchate leh sangha humhalh an nih chhan chu an puitlin hun thlenga zuah a, an inthlahpunna hun remchang siamsak hi a ni a ti a. Luidung sangha chu hmuh tur an tlem tak hle thu sawiin a chhan bulpui ber chu sangha manna hmanrua hman phalloh kan chelek nasat vang leh an inthlahpunna hun siamsak lova, a lian a te thliar lova kan man thin vang a ni a ti a. Tunah sangha humhalhna tihtak zeta kan kalpui loh chuan nakin lawkah sangha man tur an awm lo mai dawn a ni tiin he khapna hi tihlawhtling tur chuan khawtlang mipuite nen tan hona tha neih a tul a ni a ti a. Tun dinhmun mai ngaihtuah lovin kan tu leh fa, kan thlahte zel dawnin he lui humhalhna leh lui nungcha leh sangha man khapna hun chhung hi mitin ten an zawm theuh a duh takzet thu a sawi a ni.

Pu R. Rochhuma, YMA Venglai branch Advisor hnen atanga thu ngaihthlak niin India danpui Article 51A(g) kan en chuan India khua leh tui kan nihna angin nungchate humhalh hi kan tih makmawh, kan mawhphurhna a ni a ti a. Mitinin nungchate chu pa in a fate a enkawl anga enkawl tura a duh thu sawiin he programme duan a ni hi lawmawm a tih takzet thu a sawi a ni.

He hun kharna hi Pu F. Lalrinfela, DIPRO chuan hmangin kalkhawmte hnenah lawmthu a sawi a. India sawrkar pawn sanghate tawngpawng man hi a ngaihmawh hle thu sawiin Sustainable development goal ah pawh sustainable fishing a tel hial thu a sawi a. YMA te chu he sangha man khapna mai bakah sawrkar thiltih reng reng tihhlawhtlin theihna chhan lian tak an ni tih sawiin he sangha man khapnaah pawh hian theihtawpin thuneitute nen tang tlang a, thawk zel turin a sawm a ni.

Lui leh luidung nungchate humhalhna hi October ni 10 atanga December ni 10 thleng kalpui tur a ni ang.