2472/2024-2025

Aizawl, the 10th October, 2024: Project Pushpak Chief Engineer Pu Girish Prasad Singh chuan vawiin khan Mizoram Governor Dr. Hari Babu Kambhampati chu hmuin Mizoram chhunga Border Road Organisation (BRO) hnuaia hmalakna leh hmachhawpte a hrilhfiah. He meeting hi Mizoram hmun kilkhawr leh pawimawh tak takte thleng thei tura tun dinhmuna BRO kaltlanga kawngpui leh lei dawh mek thlen chinte inhrilhhriatna atana duan a ni. 

Governor Dr. Hari Babu Kambhampati chuan ramri depa awm Mizoram chhunga BRO hmalakna zinga hmasawnna ruhrel pawimawh tak, kawngpui sial hna thawhte chu hun pawt rei lo thei ang bera zawhfel a tul thu sawiin, Mizoram hmunhma chu India ram hmun dangte nena a inang loh avangin hmalak dan pawh dinhmunte thlir thiam chunga kalpui thiam a tul hle a ni, a ti a. BRO kawng siam, cheithat leh enkawl zui kawngah theihtawp chhuah turin Project Pushpak CE leh a thawhpuite a chah a ni.

Governor chuan Pushpak-in Mizoram tana project pawimawh tak tak an siam leh an thawk thin chu lawmawm tiin, tawiawm a inhuam thu a sawi a. Thawhhona tha hnuaiah project-te zawhfel thuai a nih a beisei thu sawiin, hei hian ramri dep State chawikan leh tihhmasawnna kawnga hmalaknaah Mizoram chu rinluh a nih dawn thu a sawi bawk.

He hunah hian Pushpak Chief Engineer chuan BRO hmalakna kaltlanga kawngpui thar bakah kawng awmsa, District leh ramri dep pawhtu kawngpui thawmthat kawnga hmalaknate tarlangin, tunlai thiamna nena tangkawpa kum tluana hman theih tur kawngpui tha zawk siam nana ruahmannate, inkalpawhna changtlung zawk, ram sum leh pai tihhmasawnna leh eizawnna siam thei tur tinzawna project an ruahman thin thu a sawi a. Road project-te chu armed force veivahna tinzawn ngawr ngawr ni lo, sumdawnna, tourism leh hmasawnna dang dang atana duan a nih thu a sawi a. Pushpak CE hian Governor chu October ni 12, 2024 a BRO kaltlanga project 75 te a ruala Defence Minister Pu Rajnath Singh an Sikkim atanga a hawn tur chu awm hmun atanga chhima telpui turin a sawm bawk a ni.