2471/2024-2025

Aizawl 10th October, 2024: Vawiin tlai dar 4 khan SW,TA&WCD Minister Pi Lalrinpuii hovin a Office Chamber MINECO-ah State Commissioner for Persons with Disabilities, Women and Child Development leh Mizoram State Commission for Protection of Child Rights (MSCPCR) hotute'n inrawnkhawmna hun hmangin an thukhawm.

Minister chuan a department enkawl SW,TA&WCD hnuaia Commission hrang hrangte leh Society te, rualbanlo leh naupangte enkawltu hetianga inrawnkhawmna hun leh inkawmhona hun hman theih a ni chu lawmawm a tih thu a sawi a. Kan thil tih kan inhriatsaktawnna chu phurna thar min thlentu ni ngei se tiin kalkawmte a chah a ni.

Thutkhawm-ah hian Commissioner for Persons with Disabilities hnathawh tlangpui ngaihthlak niin Rights of Persons with Disabilities Act 2016 (RPwD) danin a phut anga rualbanlote tana hamthatna hrang hrangte, abik takin Sawrkar hnathawkah 4% Job reservation, Higher Education Institutions-ah 5% seat hauhsak, Public Building-ah rualbanlote tana awlsamna siam leh Information and Communication lamah Electronic media awlsam zawka an access ve theih nana Braille leh sign language buatsaih bakah inthlanna-a vote an thlak ve theihna tura hmalakna te sawi ho a ni.

Mizoram State Commission for Protection of Child Rights (MSCPCR) chairperson Pu Jimmy Laltlanmawia chuan naupangte chanvo leh hamthatna lama an hmalaknate tarlangin tunah hian thawktu 22 an awm mek thu a sawi a. Naupangte social media-a khaw lo deuha tih lan chungchangah thil tisuala puh koh (summon) an neih thin dan leh hremna lekkawh a nih dan tlangpui a tarlang a. Pi Zohmingthangi Chhangte, Director, WCD Department chuan an department hnuaia naupang humsual dai, a bik takin ruihhlo ngai leh naupang nu leh pa enkawl tu nei lo leh naupang rualbanlote an enkawl dan tlangpui bakah Child Care Institutions (CCI) 60 an enkawl mek thu a sawi bawk a ni.

He hunah hian naupang humsual dai special home leh observation home a awm mekte enkawlna lama an harsatna te sawiho niin Home chhunga zirna in siam belh leh Juvenile Justice Board (JJB)-in naupang, tuna special home a awm mek te chu uluk zawk a ennawn leh ni se tih a ni a, Protection of Children from Sexual Offences (POCSO) hnuaia hrem te chu thlir uluk lehzual tura tih a ni bawk a ni. 

Meeting-ah hian SW,TA&WCD Jt. Secretary Pi Zonunthari leh WCD Director Pi Zohmingthangi Chhangte te bakah MSCPCR leh State Commission for Persons with Disabilities leh WCD Department officials te an tel a ni.