No.2681/2021-2022
Aizawl, 22nd October, 2021 : Luidung nungchate humhalh nan leh an inthlah pun zel theih na tura “Luidung Nungcha Man Phal loh Hun - Closed Season” puan bawhzuiin vawiin khan Fisheries Department hnuaia officer te chuan Director Pu F.Vanlallawma hovin Dialdawk luia sangha fuan tur vengtu Lengpui Model Branch YMA te duty na hmun an tlawh a. Lawmthu sawina thilpek te an hlan a ni.

Pu Vanlallawma chuan YMA member tlawmngaia an huam chhung luidunga sangha fuan tur veng tute hnenah lawmthu sawiin luidunga nungcha te kan tih chereu nasat avangin Mizorama luite chu a ruakin a bawlhhlawh em em tih a sawi a. YMA ten an mahni huam chhung luite an humhalh chu thangthar lo awm leh zel tur te tan a pawimawh tak zet a ni, tiin luidungah nungcha chi hrang hrangte zalen taka an awm a, an lo inthlah pun zel theih nan Luidung Nungcha Man Phalloh Hun(Closed season) puan a nih chhung phei chuan YMA te chu an huam chhung luite uluk lehzuala venghim turin a ngen a. Mizoram sawrkar-in 10th October - 18th December, 2021 inkar chu luidung nungchate man phalloh hun a puan chhung hian luidung nungchate man leh an fuan tur tihbuai te, nghafuan ruh te chu khap tlat a ni tih a sawiin Pu Vanlallawma chuan sawrkar thupek pawisa lo te chu The Mizoram Fisheries (Amendment) Act, 2016 Section 5(1) leh (2) hmangin jaila tantir leh pawisa chawi a hrem theih an nih thu leh sawrkar thupek hi zawm a, pawisa turin mitin a ngen bawk a ni.

10th October - 18th December, 2021 inkar hi Mizoram sawrkar chuan Luidung Nungchate Man Phalloh Hun(Closed Season) atan a puang a. Hemi hun chhung hian Fisheries Department chuan District office hrang hrangte pawh an huam chhung nghafuan venghima YMA duty na hmunte tlawh turin ruahmanna a siam a. Hmun hrang hrangah duty te insiamin luidungte chu uluk takin an vil reng dawn a. Sangha fuan turte chu tha taka an inthlah pun theih nan mitin thawhpuiah an sawm a ni.