Mizoram hmun dang te rualin vawiin khan kolasib District Lungdai khua a Lungdai YMA Hall ah Remna ni leh Sawrkar thar Lawmna hun hman ani a, FCS&CA Minister Pu K. Lalrinliana chu khuallian niin he hun hi a hmanpui.

Khuallian chuan Remna Ni hmang/lawm thei dinhmuna an ding chu thil lawmawm tak ani tiin chutih rual in zofa thangtharten Remna Ni hi lawm/hman a nih na chhan hi an hriat chian a pawimawh ani ati. Pathian in Kohhran leh mipuite tawngtaina a chhang a, A remruatna in Sawrkarna an siam a, Mizo Hnam kalphung tur chu Pathian in ruahman sa a nei a chu vangin awm mai mai hman an nilo tiin theihtawp chhuah zel tur an nih thu a sawi a Ram kaihhruaina kawngah mipuiten tawngtaipui zel se Ram kaihhruaina kawngah duh khawp lohna a awm thei a, a tulna ah mipui ten Sawrkar chu finchhuah thin se tiin kalkhawm mipuite a sawm a ni.

Khuallian chuan Mizoram hi Pathian in min pek ani a, intodelhna kawngah nasa taka tan lak a pawimawh thu sawiin,  he Ram lo la luah zel tur kan tu leh fa te tan Ro khawm tlak kan zuah sak/siam sak a ngai ani a ti. Remna ni chu Mizoram mipuiten Intodelhna kawnga suangtuahna thar neih nan hmang theuh ila, thangtharte pawhin kan Ram leh Hnam tan eng kawngin nge ke ka pen theih ang, enge Ram leh Hnam tan ka tih ve theih tih ngaituahna te pawh an sen a hun viau tawh ani a ti.

FCS&CA Minister chuan Mizoram chu kawng hrang hranga kan la intodelh loh zia ngaituahin a lung chhiat thlak ani tiin, Buhfai bakah Ran leh thlai te chu Ram/state dang atangin kan la lut nasa em em a, hei hian tan lak a tul zia a tilang chiang hle a, Pathian duh dana Ram kaihhruai a ngai a, hemi tih hlawhtlinna kawng pakhat chu Ram leh Hnam intodelh nih a ngai ani tiin intodelhna kawnga hmalakna awm reng rengah mipuite chu theihtawpa Sawrkar thawhpui turin a sawm bawk a ni. 

He hun hi Pu Eliza Lalrema'n a kaihruai a, mizo Hnam Lam leh zai chi hrang hrang entir ani a, Pu Thangkima Pautu chuan lawmthu sawiin hun a khar a, mipui kalkhawm ten Remna Ni lawmna ruai an theh nghal a ni.