Naupanga kawthalo then theitu rotavirus hrik laka invenna (rotavirus vaccine) Mizorama kalpui tur chungchangah vawiin khan Lawngtlai Press Club-ah chanchinbu mi leh thu thar theh darhtute tan "media workshop" buatsaih a ni.

He hun hawngtu Lawngtlai DIPRO Pu C. Lalhruaitluanga chuan sawrkar hma lakna puanzar kawngah thu thar theh darhtute chu a thawh hlawk ber an nih thin thu sawiin, tuna hri danna thar (rotavirus vaccine) pawh hi Lawngtlai District-ah hlawhtling taka kalpui a nih theih nan Lawngtlaia chanchinbu mite chu mipui zirtirna a tam thei ang bera puangzar turin a ngen nghal.

He media workshop hi hri danna thar kalpui tur thu thar theh darhtute'n an lo hriat chian hmasak a, hma latute mipui zirtir kawnga an lo thawhpui ve theih nana buatsaih a ni a. He hunah hian Lawngtlai District MJA President Pu ZD Dengngura pawhin media pawimawhna hria a, health department lamin an hma lakna tichak tura media workshop an buatsaih chu lawmawm a tih thu leh an buatsaih chhan a hlawhtlin ngei a beisei thu a sawi ve bawk.

He workshop-ah hian Lawngtlai District Immunisation Officer (DIO) hna chelh mektu, Sr Medical Officer Dr S. Thaizi chuan PowerPoint presentation hmangin rotavirus hrik chungchang leh a venna vaccine pawimawhna leh hma lakna kalpui tum dan tlangpui te a sawi a. India rama naupangin an thihpui natna tam ber chu hri danna hmanga ven theih natna a nih thu sawiin, naupang thihna titlem turin hri danna lak that a pawimawh thu a sawi a. Rotavirus pawh chu naupanga thihpui tham kawthalo thlen theitu a nih avangin leh damdawi hran hmuh chhuah a la nih loh avangin hri danna lak chu a ven theihna kawng tha ber a nih thu a sawi.

Rotavirus (RV) vanga kawthalo (diarrhoea) hi khawvel puma hri leng a ni a. Ram tam tak chuan Rotavirus Vaccine (RVV) hi kalpuiin an hlawhtlinpui tawh a. Kawthalo pangngai leh RV vanga kawthalo hi hriat hran a har hle a, damdawi hranpa pawh a la awm bawk si loh avangin RV vaccine lak hi invenna kawng tha ber leh awm chhun a ni rih a, khawvel hriselna ngaihtuahtu pawl “World Health Organisation (WHO)” pawhin Rotavirus Vaccine (RVV) hi khawvel ram tinin kalpui turin kum 2013 khan hriattirna a lo chhuah daih tawh a ni.

India ram bikah chuan naupang damdawi ina enkawl 40% chu RV kawthalo vang niin, kum 2011-2013 chhung khan kum tin naupang kum 5 hnuai lam 78,000 vel zelin an thihpui anga chhut a ni a. Kum 2016 atang khan RVV hi state thenkhatah kalpui ve tan niin, tun thleng hian state 11-in an kalpui tawh a. Mizoramah pawh tunah hian kalpui tura hma lak mek niin, kan kalpui ve leh thei a nih chuan state 12-na kan ni dawn a ni.