Vawiin chawhnu dar 2:00 khan Zotlang, Lunglei a Social Welfare Department Office Cum Nutrition Godown sak hna tan niin, Social Welfare Minister P.C Lalthanliana’n bultan nan lungphum a phum. He Office cum Godown hi Ground floor nen chhawng ruk (6) hi Rs. 37,84,100 seng a sak tura ruahman niin, Lunglei leh Aizawl inkar kawngpui Zotlang vengah a awm a ni.

Minister chuan Social Welfare Department hnathawh tamtak hi mipui in an hre chiang tan a, tunah pawh central sawrkar Department 6 in Social Welfare Department chu Nodal Department atana a hmang mek in Mizoram tan nasa takin hna a thawk mek a ni. Vawiin a bultan Office Building chu Lunglei District tan hmasawnna anih thu leh a awmna veng mipui te pawn an ta neih a tul thu a sawi. Tun dinhmun ah Lunglei District chhung ah Social Welfare Department in kawng tam tak ah hma a lak mek thu a sawi a. Chung zing a langsar deuh te chu Anganwadi Training Centre, Vocational Training Centre tih changtlun leh Integrated Child Protection Scheme hma lakna awm mekte an nih thu tarlan a ni.

Vawiin Programme hi Pu P. Lalhmangaihzuala, Dy. Director cum CDPO in kaihruaiin Pu Lalthankima, AE, SWD in Technical report a pe bawk. He Building hi CDPO, Project Officer leh DSWO te Office a tan hman tum anih bakah Nutrition Godown leh Staff Quater atan te hman a ni bawk ang.